القراءة | دوائر عرض وخطوط طول لسنتك الجديدة

بسم الله الرّحمن الرّحيم 

السّلام عليكم ورحمة الله وبركاته

نكمّل في هذه التّدوينة سلسلة " دوائر عرض وخطوط طول لسنتك الجديدة"

أوّل ما يسألنا أحد إيش هي هواياتك؟ 

إيش الإجابة المتكرّر سماعها غير السّباحة وركوب الخيل؟ 

غالبًا تكون القراءة وكثير منّنا يحبّ يقرأ الحمدلله! 

بس في مفهوم مغلوط منتشر جدًّا بين النّاس؛ هو إن القراءة هواية. نصحّح هالمفهوم مع بعض ونقول إنّ القراءة أكثر أهميّة من كونها هواية ومجرّد تسلية لوقتي الضّائع أو وقت الفراغ. القراءة حاجة ملحّة وضرورة يتحتّم علينا ممارستها عشان نرتقي فكريًّا وأدبيًّا وسلوكيًّا! القراءة بحر كبير ولازم نعرف كيف نستفيد منّه ونكسبه ونخلّي له أولويّة  خاصّة بحياتنا ويومنا. 

غالبًا يكون في مجال أو مجالين هم أكثر شيء نحب نقرأ فيهم. 

طيّب كوني أحبّ بس كم مجال هل هذا يعني إنّي أحصر نفسي فيهم وما أقرأ غيرهم لأنّي ما أحبّ وما أستمتع بباقي مجالات الكتب؟ 

زيّ ما حكينا قبل إنّها ضرورة وحاجة فهذا لا يعني إنّي لازم أقرأ بس أنواع الكتب إلّي تعجبني وأترك الكنوز الموجودة في المجالات الثّانية. 

طيّب يعني أغصب نفسي أقرأ وأتغصّب القراءة؟ 

بعطيكم مثال بسيط يجاوب على هالأسئلة ويوضّح لنا أهميّة هالموضوع .. الأدوية إلّي ناخذها لمّا نمرض وتحديدًا الأدوية إلّي تكون شراب وواضح طعمها مو زيّ الحبوب، نحبّ نشربها ونستمتع فيها؟ أكيد لا! 

 ليش ناخذها طيّب لو ما نحبّها؟ لأنّها مفيدة لنا ولأجسامنا ولأنّها تساعدنا على الشّفاء بعد الله سبحانه وتعالى. 

القراءة تقريبًا نفس الشّيء نقدر نسقطه عليها، لأنّها ضرورة فمو شرط أنبسط وأستمتع في قراءة المجالات إلّي ما أحبّ قراءتها لأنّها بإذن الله حتعطيني فائدة وعلم وبلاغة كبيرة في مجالات مختلفة.

إيش تفرق القراءة عن الدّواء؟ 

الدّواء مهما استمرّينا نشربه الغالب ما حيعجبنا طعمه، أمّا الكتب بإذن الله بعد فترة نبدأ نستسيغها وبعد فترة ممكن نحبّها وتصير مجالات كثيرة تستهوينا بدل ما كنّا محصورين في مجال او اثنين بس.

* كتاب ٢٧ خرافة شعبيّة عن القراءة للدّكتور ساجد العبدلي كتاب جمميل جدًّا ويصحّح مفاهيم كثيرة نغفل عنّها حول القراءة، أنصح بقراءته.

وعن تجربة شخصيّة .. أوّل ما بدأت قراءة بديت بالرّوايات البوليسيّة بس! وتحديدًا روايات أجاثا كريستي، يعني أنواع الرّوايات الثّانية إطلاقًا ما كانت تستهويني، بعد فترة بديت أقرأ روايات تحكي معاناة عاشها أشخاص (غالبًا تكون قصّة واقعيّة) جلست يمكن ٣ سنوات أو ٤ وأنا هذا المجالين بس إلّي أقرأ فيهم وفي خلال هالفترة بديت أقرأ لكتّاب أكثر  في هالمجالين، بعدها دخلت نادي "سفراء القراءة" ومن هنا بديت أقرأ كتب مختلفة في مجالات ما قد قرأت فيها، كان هالنّادي بمثابة نقطة تحوّل لي في هالموضوع حسّسني بأهميّة قراءة مجالات مختلفة وصرت فعلًا أحبّها وأستمتع فيها جدًّا والحين صار أقل مجال ألتفت له مجال الرّوايات (مو قدحًا بفائدتها أبدًا بس أقدر أقول لقيت ضالّتي في المجالات الثّانية) هالشّيء ما يصير بيوم وليلة، ياخذ وقت وحبّة حبّة نتطوّر ونصير أفضل فيه بإذن الله.

الوسيلة الوحيدة للنّجاح هي الاستمرار بقوّة حتّى النّهاية! 

والاستمراريّة هي النّقطة إلّي تأرّق كثير منّنا وتواجه كثير من القرّاء. نحبّ نقرأ ونستمتع جدًّا بس كيف نلتزم وما نترك القراءة؟ هنا يجي دور الأفكار العمليّة البسيطة إلّي تساعدنا أكثر ع الاستمراريّة وأتمنّى تستفيدوا منّها ✨ :

- التحقي بنادي قراءة :

نادي القراءة من أفضل الطّرق إلّي فعلًا تخلّينا نستمر نقرأ، ومو بس كذا! تخلّينا نقرأ كمان بتركيز أكبر وتخلّي قراءتنا ناقدة أكثر ونحاول نجمع اقتباسات ونعلّق على جزئيّات كثيرة من الكتاب المحدّد قراءته، وفعلًا حتلاحظي نفسك  بعد فترة إن الكتب إلّي تكون محدّدة لنادي قراءة وتقرئيها وتحضري لقاء مناقشتها حترسخ في بالك أكثر وحتستفيدي من كمّ المعلومات إلّي فيها تحديدًا بشكل يختلف عن الكتب إلّي تقرئيها لوحدك لأنّك كمان حتسمعي وجهات نظر وتعليقات أشخاص ثانيين عن نفس الكتاب فحتصير نظرتك له أوسع وأشمل ✨. 

طيّب لو فرضنا ما اتيسّر لك أو ما حصّلتي نادي قراءة يناسب وقتك أو مواصلاتك وحابّة فكرته إيش ممكن تسوّي؟ نسّقي لنادي قراءة بينك وبين صاحباتك، أو بنات خالاتك وعمّاتك .. اختاروا كتب محدّدة وحدّدوا مثلًا يوم بالشّهر تجتمعوا وتتناقشوا في واحد من الكتب المختارة؛ فكرة بسيطة تخلّيكم تستمرّوا في القراءة وتفيدوا بعض  وبنفس الوقت تستفيدوا من وقت جمعاتكم وما تكون كلّها بس سواليف ولعب. إذا طبّقتوا هالفكرة حاولوا تنوّعوا بالكتب أكثر لا تخلّوها كلّها في مجال واحد عشان تستفيدوا بشكل أكبر.

- نسّقي جدول قراءة :

حدّدي مثلًا كتاب لكلّ أسبوع، أسبوعين أو شهر.

لو قرأتي كتاب كل أسبوع حتنتهي السّنة وانتِ مخلّصة ٤٨ كتاب، ولو قرأتي كتاب كل أسبوعين حتخلّص السّنة وانتِ منتهية من ٢٤ كتاب، ولو قرأتي كتاب شهريًّا حتكوني قرأتي ١٢ كتاب بالسّنة. شوفي مقدرتك وعلى أساسها حدّدي كم هدفك من القراءة خلال سنة. 

مو شرط تختاري من الكتب إلّي تكون ٤٠٠ صفحة أو أكثر! اختاري كتب بسيطة وخفيفة مثلًا إلّي تصير ١٠٠ صفحة أو ١٨٠ صفحة عشان تقدري تستمرّي أكثر وما تطفشي. 

حطّيها قاعدة في بالك دائمًا وأبدًا "قليلٌ دائم، خيرٌ من كثيرٍ منقطع" لا تحطّي لنفسك جدول خارق وغير واقعي عشانك متحمّسة وتحبّي القراءة، حطّي جدول واقعي وتقدري فعلًا تلتزمي فيه! وتذكّري إن المهمّ الفائدة إلّي حتوصلي لها مو العدد.

تبغي اقتراحات لكتب خفيفة وصغيرة؟ هالكتب أنصحك  بقراءتها : 

- رأيت رام الله ، مريد البرغوثي

- أعظم سجين في التّاريخ ، د.عايض القرني

-  رقائق القرآن ، د.إبراهيم السّكران

- مسلكيّات ، د.إبراهيم السّكران

- خصّصي وقت محدّد للقراءة يوميًّا :

‎وقت ما ترتّبي جدول مهام يومك خصّصي وقت محدّد للقراءة لو بس ١٠ - ١٥ دقيقة، أو مثلًا حدّدي نصاب معيّن (٢٠ صفحة باليوم مثلًا) وناضلي عشان تحقّقين هالمهمّة يوميًّا وتذكّري هالعبارة

 كي تصبح بطلًا عليك بمواصلة نضالك

لأن الأشخاص إلّي نشوفهم سنويًّا ينتهون من ٥٠ كتاب أو أكثر واصلوا وناضلوا عشان يوصلوا لهالخطوة وإحنا قدّها ولها بإذن الله💘.

- شاركي في تحدّي قراءة :

في تحديّات للقراءة إلّي تكون لمدّة سنة تقريبًا، مثل تحدّي القائمة من بوكتشينو، فكرة جميلة جدًّا وتحمّس إنّك تكمّلي قراءة وما توقّفي. وممكن كمان نفس قائمة التّحدّي هذه تحاولي تخلّصيها انتِ وأقاربك أو انتِ وصاحباتك وتكون زيّ المسابقة بينكم عشان تحمّسوا بعض أكثر وتكون روح المنافسة عالية بينكم فتستمرّوا.

- قائمة القراءة :

- "بيديّ كتاب" هو دفتر من متجر غراس يساعدنا نحصر الكتب إلّي نبغا نقرأها مع أسماء الكتّاب ونقدر نضيف اقتباسات وفوائد من الكتب في هالدّفتر الصّغير فيكون قائمة وبنفس الوقت مرجع لك لاحقًا.
وممكن تستخدمي أي دفتر عندك وتقسّميه بتقسيمات تناسبك.

-‏Goodreads  كمان يتيح لنا الفرصة إنّنا نحدّد قائمة للكتب بأسماءها وأعدادها بحيث تحطّين هدفك للسّنة وتصيري تتابعي فيه كل ما تخلّصي من كتاب ويصير يطلّع لك كم خلّصتي وكم باقي لك عشان توصلي للهدف إلّي اخترتيه. هالفكرة للأمانة ما طبّقتها بس بإذن الله مع بداية السّنة الميلاديّة حأبدأ بتطبيقها. نطبّقها سوا😻؟ 

- جرّبي الكتب السّمعيّة :

أحيانًا يروح وقت طويل في السّيّارة أو في أماكن مثل النّادي وغيرها وتبغي تستفيدي من هالوقت إيش ممكن تسوّي؟ استخدمي الكتب السّمعيّة واستفيدي من هالوقت المهدر واطلعي منّه بفائدة عظيمة.
كثير من الأحيان نسرح وإحنا نسمع لمّا ما يكون في فيديو مرئي مع الكلام المسموع وبس نخلّص من المقطع نحس إنّنا ما استفدنا شيء من سماعنا لهالكتاب أو المقطع بغضّ النّظر إيش كان، صدّقيني إلّا ما تطلعي بفائدة من سماعك له، لو حتّى جملة أو معلومة وحدة حتثبت بإذن الله في ذهنك.

"إذا لم تستطع فعل أشياء عظيمة، فافعل أشياء صغيرة بطرق عظيمة"

عندك أفكار إضافيّة أو معلومات ممكن تفيدنا حول نفس الموضوع؟ أسعد جدَّا بكتابتك لها في التّعليقات!

"سبحانك اللّهمّ وبحمدك، أشهد أنّ لا إله إلّا  أنت، أستغفرك وأتوب إليك"