هاكونا ماتاتا : رحلة جنوب أفريقيا

بسم الله الرحمن الرحيم 

السلام عليكم ورحمة الله وبركاته 

نظرًا لكثرة الأسئلة وطلب مقترحات لجنوب أفريقيا قررت إختصارًا للوقت وعشان تكون مرجع محفوظ دائمًا إني أكتب تفاصيل رحلتنا والتقييمات في تدوينة يسهل الرجوع لها 

بعض التفاصيل المهمة عن رحلتنا :

• الفترة : June-July 2019
• الجو : بداية الشتاء (وقتها ما كان البرد قارص، بس مرة كان حلو يبغالكم تدفوا شوية) 
• المدة : أسبوعين ونصف تقريبًا
• الانترنت :  أخذت شريحة بيانات من ڤودافون أول ما نزلنا في مطار جوهانزبيرق فيها ١٠ قيقا كفتني قرابة ١٥ يوم ولا قطعت علي أبدًا وأنا أستخدم كل برامج التواصل إلا اليوتيوب أستخدمته شوية بس، كانت تقريبًا ب١٧٠ ريال أو حولها.

بالبداية بحكيكم عن كم نقطة حبيناها في البلد بشكل عام، الشعب و ن ي س مليون مو طبيعي كيف تمنيت أجيب منهم شوية للسعودية؛ يحبوا الرقص والمزح والطقطقة ونفسهم خفيفة مرة وكنا ما نركب مع سواق إلا نقعد نسولف معاه إلين ما نوصل لوجهتنا. في نسبة لا بأس بها من المسلمين سواء كانوا جنوب أفريقيين الأصل أو من السكان بشكل عام خصوصًا في كيب تاون. ما شفت منهم أي مضايقات تجاه الحجاب لا لي ولا لغيري وكمان في من نفس البلد في كيپ تاون تحديدًا عدد من البنات محجبات فموضوع الحجاب والإسلام مُحترم عندهم الحمدلله. البلد نظيفة أكثر مما توقعت سواء شوارعهم أو الأسواق أو حتى دورات المياه العامة ! تفاجأنا إنه حتى دورات مياه المحطات نظيفة جدًا تبارك الله ! ويهتموا بإعادة التدوير بشكل خيالي كل شيء عندهم مُعاد تدويره، البلد رخيصة بشكل خرافي! البلد بشكل عام يغلب عليها مناطق الحيوانات فلو كنتوا من محبي الحيوانات مثلي حتكون التجربة لا تنسى ! 

نصيحة مهمة .. الجزم إلي تحبوها وتخافوا تخرب لا تاخذوها معكم إلا لو بس حتلبسوها في السوق والمطاعم لأن غالب الأماكن موية وتراب وطين وحصى والجزمة حتنعدم فيها، عندي جزمة مسميتها جزمة السفاري ومن جد من أكثر الأشياء إلي حمدت ربي عليها لأنها ما تزحلق ومناسبة جدًا للغابات والهايكنق، اشتريتها من تمبرلاند أتوقع بحدود ال٣٠٠ ريال  أو حولها

المناطق إلي زرناها :

• Johanezburg :

الأوتيل : Saxson 

ي م و ت الأوتيل كأنه في غابة حلو للتمشاية فيه مرة، والغرف حلوة مرة وطابعها أفريقي فخم، بس إلي ما عجبنا فيه إنه دورة المياه مو مرة فيها خصوصية بس غير كذا الاوتيل مرة حلو .

*الصور من موقع الأوتيل

الوافل إلي باليوقرت في فطور الأوتيل كان لذيذ مرة

بشكل عام جوهانزبيرق غالبًا ما يُنصح بزيارتها إلا لو ليلة وحدة بس تريحوا لأنه مافيها شيء الصراحة وهي أكثر بلد خطر من ناحية السرقات ( السرقة إلي يوقفك واحد ويخليك تطلع كل إلي معاك) ! الحمدلله ما تعرضنا لشيء بس معروف عنها هالنوع من السرقات؛ وتحسبًا لهذا الموضوع جبت شنطة "rattan bag"خصيصًا لجوهانزبيرق عشان ما أعرض نفسي للسرقة، طلبتها من أمازون وفي منها عدة أشكال مربعة ودائرية وممكن تضيفوا معها سكارفات مختلفة تحلي شكلها

اخترت تقريبًا أكبر وحدةة حجمًا، وكانت تكفي : كارد هولدر، جوال، شاحن متنقل وسلك ، روج، مرطب، كريم يد، علك وفيها شوية مساحة زيادة 

رابط الشنطة من أمازون :  https://www.amazon.com/gp/product/B07GCPF7GY/ref=ppx_yo_dt_b_asin_title_o00_s00?ie=UTF8&psc=1

في عندهم ساحة نيلسون مانديلا حلوة وفيها مطعم ستيك لذيذ اسمه The Big Mouth جربنا من عندهم نوعين ستيك وكانوا مرة لذيذين باقي الأشياء ما جربناها، وبنفس الساحة لو تمشيتوا فيها ممكن تدخلوا على مول -ما حتستوعبوا إنكم دخلتوا المول إلا لو شفتوا اللوحات أو سألتوا-،  فيه دور فيه تقريبًا محلات كل الماركات بولقري، كارتييه، أرماني، ال في ... هذا تقريبًا أحسن مول زرناه في جنوب أفريقيا كلها فلا ترفعوا سقف التوقعات في التسوق. 

بعدها سافرنا بالطيارة على جورج واستأجرنا منها سيارة، طلعنا على القاردن روت بالسيارة؛ القاردن روت هي عبارة عن منطقة فيها مدن زي لمن نقول الحجاز فيها مكة وجدة والمدينة ... 

• The Garden Route - Wilderness : 

الأوتيل : the view boutique & spa 

الاوتيل رااايق مررة ومطل على البحر وصعنطوطي مرة ويعطي شعور حميمي، كنت بجرب السپا بس للأسف كل اليومين إلي جلسنا فيهم كانوا fully booked بس شكله مرة حلو الصراحة فلو حصل لكم فرصة جربوه وقولولي كيف يكون.

*الصور من google

جربنا مطعم لا ننصح فيه أبدًا اسمه Zucchini .

وباقي أكلنا كان بالأوتيل (البانكيك بالفطور كان حلو إلي باليوقرت والتوت، بس الشكشوكة ما ننصح بتجربتها لأنها كانت عبارة عن إيدام غريب) 

•  Redberry Farm :

من الأماكن الحلوة الي رحناها هي مزرعة الفراولة،  بس ما حتاخذوا فيها وقت طويل بالكثير 15-30 دقيقة ولو مططتوا الوقت حتصير 45 دقيقة، اللاتيه بالكافيه حقهم كان خفيف ولذيذ.

هذه اللوحة تمررا صحن الفراولة منها عشان يتأكدوا إنكم ما تجاوزتوا الحد المسموح من الفراولة

• National Park :

 ت م و ت مو طبيعي الترتيب والتنظيم، مرة ما توقعته كذا وفيها فعاليات كثييير ممكن (رحلة ساعة بالمركب، مراكب تجديف، هايكينق، ممكن تستأجروا سيارة رحلات الي تصير زي البيت أو تستأجروا كوخ وتسووا كامپنكق كم يوم أتوقع هذه الفعاليات الي في ما أعرف لو في غيرها ولا لا) 

الهايكينج كان مرررة حلو وممتع وغير عن التراب والحجر الي نسويه بالرياض

صورة من رحلة المركب

وفي بوسط الهايكنج مكان نعدي من فوق النهر بزي جسر ندفه بنفسنا بالحبل كانت من أحلى الفقرات في الهايكنج. 

• Map of Africa :

هي عبارة عن منطقة مرتفعة تشوفوا فيها كيف شكل الأنهار مع الطبيعة صايرة كأنها خريطة أفريقيا، ما حياخذ منكم الموضوع إلا ١٠ دقايق بالكثير وممكن تتمشوا في نفس المنطقة إما برجولكم أو بالسيارة.

تقريبًا هذا كل الموجود فيها لأنها أقرب لإنها تكون قرية أكثر من مدينة؛ بس الناشونال بارك ممكن تكون وجهة لأكثر من يوم وكل مرة تسووا نشاط مختلف فيها خصوصًا التخييم أقدر أتخيل إنه حيكون تجربة مرة حلوة.

• The Garden Route - Knysna : 

الأوتيل : Pezula hotel & resort 

الأوتيل مرة حلو ! ريزورت من جد 

كبير والتمشاية فيه مررة حلوة لأنه كله زرع والغرف منفصلين عن بعض صاير كأنه فلل صغيرة وعشان تطلعوا للريسبشن تمشوا بالهواء، وتقدروا تمشوا برجولكم أو تطلبوا سيارة القولف توصلكم. السپا حقهم حلو مرة جربت عندهم المساج العادي وكان من جد يفك العضلات تفكيك !

هذا شكل المبنى لكل ٤ غرف منفصلة عن بعض

بالنسبة للأكل فطور الأوتيل عادي جدًا، غداهم وعشاهم مو حلو أبدًا وما ننصح فيهم إطلاقًا.

عندهم مطعم إيطالي في الووترفرونت لذيييذ جدًا اسمه Cafe Mario جربنا من عنده :
- بيني أرابياتا (ممتاازة)
- مارقريتا بيتزا (عادية، ووصلتنا باردة)
- فيتوتشيني ألفريدو وأضفنا معها بروكلي واستبدلنا الهام بالدجاج (لذيذة)
- Polo al limone (لذيذة جدًا جدًا) 

جلسة المطعم حميمية, بس الطاولات بزيادة ملصقة ببعض فصاير ترتيب المطعم حوسة شوية بس خدمتهم ممتازة والويترز ومدير المطعم حبوبين مرة.

•  Elephants Park :

 مرة تجربة تستاهل الزيارة الصراحة ! 

في البداية ورونا فيلم وثائقي من صنعهم عن الفيلة 

بعدين نروح نأكّلهم ونتصور معهم ونجلس شوية معهم بعدين نرجع، الزيارة هذه تقريبًا أخذت مننا ٣٠-٤٥ دقيقة، ننصح بإنه يكون معكم قارورة موية لأن المنطقة الموجود فيها الفيلة مافيها مغاسل فحتضطروا تنتظروا إلين ما تنزلوا تحت وتغسلوا بالمغاسل لو ما كان معاكم موية، والفيلة شوية توصخ اليد الصراحة.

• Monkey Land :

عن مكان كبييير كللله قرود كأنكم تتمشوا بالغابة فيه تقريبًا ٧ أنواع وكل نوع في منه عدد كبير بس مهم تنتبهوا على أغراضكم وما تخلوا معكم أشياء ملفتة أو أكل لأنه في قرد كان حيسرقنا من جد،  أخذت مننا الجولة تقريبًا ١٥-٢٥ دقيقة 

تصميم المنطقة بنفس هالشكل، الشجر فوقكم وجمبكم والقرود مفلوتة 

• Juckany "Wild Cats" :

 هذا مكان جمب المونكي لاند وتابع لهم، المكان كبير زي حديقة الحيوانات بس مخصص لـ wild cats إلي هم الأسود والنمور والفهود والوشق وهذه الحيوانات 😍 وأحلى شيء إن إلي يسوي التور فاهم مرة بالعلوم فيعطيكم معلومات حلوة عنهم ودقيقة  مرة، أخذت مننا الجولة تقريبًا ١٥-٢٥ دقيقة

* في كمان مكان تابع لهم حق طيور بس ما رحناه 

• Waterfront :

يقولوا إنه مرة كبيير بس هو مو مرة كبير عشان ما تنخدعوا بس 😂 رحناه مرة بالليل ومرة  العصر حلو بالوقتين بس بالشمس أحلى من الليل عشان المنظر أوضح، فيه عدة محلات لوكال وعدة مطاعم وغالبها بحرية بس ما جربناهم، جربنا عندهم المطعم الإيطالي إلي تكلمت عنه فوق Cafe Mario، وجربنا قهوة من كم مكان وكانوا حلوين.

* الصور من google

• السفاري :

بعدها رحنا للسفاري وكانت من جد من أحلى التجارب إلي عشناها لأنكم تقدروا تشوفوا من جد كيف الحيوانات تعيش في الغابة من جد مو زي حدائق الحيوان إلي يصير محبوس بقفص ومو حُر ! 

سكنا في Gondwana السفاري هذا رهيب، أولًا ترحيب الموظفين وتعاملهم رهيب مرة وخدمتهم حلوة، والمكان يعيشك جو السفاري من ناحية الديكور وكيف إن الغرف عبارة عن أكواخ ديكورها حلو مرة وحتى ديكور اللاونج والريسبشن نفس الشيء، بس عيبها الشاور في وسط الغرفة ومافي ستارة ولا باب ولا شيء يغطي .. فالخصوصية بالشاور صفر! فيبغالكم تقريبًا خطة للترويش بالدور واحد يستنى باللوبي عبال ما الثاني يخلص ترويش.

هذا شكل الأكواخ من برى

إيش فكرة السفاري؟ وكيف الوضع هناك؟ 

السفاري عبارة عن مكان تقريبًا يبعد ٤٥ دقيقة إلى ساعة عن المدينة، هو منطقة كبيرة جدًا زي الغابة بس غالب أشجارها قصيرة ومليانة حشائش فتقدروا تشوفوا أغلب المكان، وياخذكم التور قايد في جولة بين أرجاء المنطقة عشان يوريكم الحيوانات .. 

*إنك تروح السفاري لا يعني إنك حتشوف كل الحيوانات*  

لأنه في حيوانات تتخبى وفي حيوانات لها مكان معين بس تحبك سبحان الله إنها ما تكون في مكانها لمن تروحوا فانبسطوا بالموجود؛ بعض الحيوانات إلي شفناها :

الغزلان

الأسد

 الزرافة

وحيد القرن "rhino"

عشان تصير عندكم فكرة أكبر عن السفاري بوصف لكم اليوم من أوله عشان تتخيلوا كيف النظام وتجيبوا معكم إلي تحتاجوه: 

أول شيء تبدؤوا تتجمعوا الساعة ٦:٣٠ الصباح في اللاونج المخصص، حيكونوا مجهزين لكم شاي وقهوة وشابورة لذيذة لا تفوتوها

على الساعة ٧ يبدأ ركوب السيارات والانطلاق في السفاري، السيارة الوحدة تكفي تقريبًا ١٠ أشخاص بدون السواق إلي هو التور قايد حقكم

 

السيارات مكشوفة، والفترة إلي إحنا رحنا فيها كان برد والهواء مرة قوي لمن نمشي بالسيارة فضروري تكونوا متدفيين كويس خلال هالرحلة وفي لبس هم حاطينه بالسيارات إلي تشوفوه بالصورة تحت ننصحكم وبقوة تجربوه لأنه من جد يعزل الهواء

مرة حلو يكون معكم منظار عشان الحيوانات البعيدة تقدروا تشوفوها كويس وفي حال ناويين تاخذوا معكم كاميرا خذوا عدسة للتصوير من بعيد، تقريبًا حتتجولوا في المنطقة إلى ٨:٣٠-٩ صباحًا، تقدروا تتأكدوا من التور قايد احتياط، بعدها توصلوا مرة ثانية للأوتيل وتفطروا،  فطورهم كان حلو جربنا الأومليت كانت حشوته لذيذة، واليوقرت عندهم لذييذ مرة ألذ يوقرت ذقناه خلال الرحلة. بعدها ترتاحوا إلى وقت الغداء -مو متأكدة أي ساعة وما جربنا غداهم- بعدها على الساعة ٣:٣٠ أو ٤ تتحركوا للجولة الثانية نفس فكرة الجولة الأولى وتقريبًا نفس المدة ترجعوا الأوتيل على الساعة ٦ أو ٧ وممكن تطولوا زيادة لو كل إلي بالسيارة موافقين بعدها ترجعوا للأوتيل يكون وقت العشاء كانوا حاطين بالبوفيه شوربة لذيذة بس ما أتذكر إيش مكوناتها لأني كنت وقتها بردانة وأبغا أي شيء يدفي فكان أهم شيء عندي إنه يكون بس حلال، جربنا من عندهم الستارتر "كرات الريزوتو" كانت لذيذة، وبعدها دجاج تندوري كان عبارة عن دجاج متبل لا يمت للتندوري بأي صِلة والرز كان مو مستوي .. ،  بعد العشاء يكون انتهى اليوم وتقدروا ترجعوا كوخكم بسلام، في ميزة حلوة بمرتبة السرير إنها مزودة بتقنية تدفئة وبقول لكم على خدعة حلوة لمن تطلعوا للجولة الأولى لو تبغوا السرير أدفى عشان تناموا لمن ترجعوا شغلوا تدفئة المرتبة وحطوا مخدات مكان نومكم كأنه في أحد بالسرير وغطوها بالبطانية ترجعوا والسرير يشهيكم للنوم من الدفء.

وجهة نظرنا .. يوم واحد يكفي مرة للسفاري ما يحتاج أكثر من يوم، بس أهم شيء تروحوا كل الجولتين ✔️

ولأن الأوتيل بوسط هذه المنطقة فلازم تكونوا حذرين في الدخلة والطلعة لأن ممكن تجي حيوانات عند كوخكم؛ إحنا كمثال زارتنا الحمير الوحشية تقريبًا ٥ منهم 

• Cape Town : 

هنا تشوفوا السياح والمواطنين بجميع أشكالهم، والمسلمين أكثر فيها، معروف عن كيپ تاون إنها مليانة أكتيڤيتيز ومناطق سياحية أكثر من غيرها.

كم أفضل مدة نقعد فيها في كيپ تاون؟ 

أسبوع إلى ١٠ أيام بالكثير، أكثر من كذا نشوف إنه كثير عليها

أنشطة كيب تاون :

إلي ممكن تسووها كثير، بس بكتب لكن عن إلي رحناها : 

• Waterfront :

عبارة عن تجمع محلات ومول ومطاعم ومقاهي وشوية ملاهي، حلو صباحًا ومساءً، وأحلى وقت على العصر مع الغروب ، فيه محلات حلوة أكثر من المول Zara, H&M, Gucci, Louis Vittoun, Ted Baker ... وحلو تروحوه أكثر من مرة ما ينطفش خصوصًا فيه كثير street bands يغنوا ويرقصوا مسويين جو مرة 

• Cannal Walk Mall :

 الصراحة المول مو مرة حلو ما حبيت المحلات كثير بس لازم 

• ركوب الأحصنة على الشاطئ :

كان من أكثر التجارب الممتعة والمختلفة جددًا عن ركوب الحصان على العشب ولا التراب تجربة حلوة مرة

هذا شكل الاسطبل من جوا

في هذه الغرفة لبسنا الخوذة وأعطونا شنطة تتسكر بسحاب للأغراض إلي ممكن تطيح مننا خلال الجولة، لأنها لو طاحت في الموية يمكن يجي موج قوي  وما نقدر نلقاها مرة ثانية

 نهاية الجولة رجعنا على الأحصنة للاسطبل مرة ثانية ونزلنا بنفس المكان إلي ركبنا فيه

• جولة بالهيليكوپتر حول كيپ تاون :

كمان كانت من التجارب الممتعة والمختلفة ممكن تاخذوا جولة نص ساعة أو ساعة 

أخذنا المكتب من الووترفرونت بسيارة القولف لمنطقة الهيليكوبترز وبعد ما خلصنا من الجولة رجعنا لنفس مكاننا بالهيليكوبتر كمان

منطقة الهيليكوبترز 

 أثناء الجولة 

منظر المدينة من الهيلوكوبتر

في منطقة الووترفرونت مليانة بوثات للشركات إلي عندهم هيلكوبتراكت، تقدروا تحجزوا عند إلي تشوفوها مناسبة لكم.

• Cape Town Oistrech Ranch :

 عبارة عن مزرعة للنعام تاخذوا نبذة عن النعام وتكوينهم بعدها تشوفوا جنسيات مختلفة للنعام كل نوع من بلد ويعطوكم أكل تأكلوهم بعدها في فقرة إنكم تركبوا على النعامة ويصوروكم بس الصراحة أحس حرام مسكينة النعامة خصوصًا إنه الطريقة إلي مسكرين عليها فيها عشان يركبها الواحد شوية مافيها رحمة فما أشجع على ركوبها أبدًا 

مدخل المزرعة 

قبل ما نطلع للنعام يعطونا شوية معلومات عن تكوينهم وتغذيتهم

في هذه الصورة يتضح لكم إنه الأكل عبارة عن حبوب ذرة مع حصى لأن النعام مالهم أسنان فهالطريقة تساعدهم في طحن الحبوب

يعطوكم كمان أكل مخصص للنعام عشان تجربوا تأكلوهم

 بيض النعام سبحان الله يقدر يتحمل يشيل وزن إنسان

• Boulders Beach penguins colony :

شاطئ كله بطاريق بانيين جسر فوق رمل الشاطئ بحيث تمشي وتشوف البطاريق على اليمين وعلى اليسار ما تصير قريب منهم مرة ولا تلمسهم ولا تأكلهم 

 بداية الجسر إلي يوصلنا للبطاريق

• Table mountain :

 هذا الجبل تطلعوا لقمته بالتلفريك وتلقوا مقهى ومطعم فوق ممكن تجلسوا فيهم

 في القمة ممكن تحجزوا تذاكر وتنزلوا ١١٢ متر بالحبل من الجبل وبعدها تكملوا هايكنج إلى القمة مرة ثانية هذه كانت من أعظم التجارب إلي جربناها مو طبيعي كيف كانت حلوة

 اسم الجهة المسؤولة عن النزول بالحبل Absil Africa 

 بعد ما ننزل بالحبل نطلع مرة ثانية للقمة بس هالمرة برجولنا، فهنا تصير تجربتين في واحدة نزل من الجبل بالحبل بالإضافة إلى هايكنج، إذا كنتوا تفكروا تنزلوا من الجبل ننصحكم بلبس جزمة كبيرة مناسبة للهايكنج لأن المسافة كبيرة مو بسيطة، وصادف اليوم إلي رحنا فيه إنه الجبل كان مليان بقايا مطر من اليوم إلي قبله فشوية تبهذلنا لأننا ما كنا مستعدين ولا نعرف عن هالفعالية.

ختمنا الجولة بهوت تشوكلت لذيذ جدًا من نفس المقهى الموجود في قمة الجبل

• Cape Town Diamond Museum 

متحف للألماس ياخذوكم في جولة في بدايته عن الألماس وتاريخه وتصنيعه 

وبعدها تمروا على الموظفين وهم يشتغلوا على الألماس 

 وبالأخير يشرحلكم التور قايد عن أنواع الألماس من حيث (اللون، النقاوة، الحجم، القصة) وممكن بعدها تشتروا من عندهم

• Bo-Kaap

المباني الملونة تعبر عن تقبل اختلاف الأعراق والألوان والحرية، وأغلب السكان في هالمنطقة من المسلمين

*الصورة من google

• Cape Point :

 هي نقطة التقاء المحيط الهادي مع الأطلسي وقريبة جدًا من  "رأس الرجاء الصالح" ومليان قرود هناك"بابونز" فانتبهوا على أغراضكم عشانهم ما يسرقوها القرود خصوصًا الأكل، وإحنا طالعين للتلفريك وقفتنا وحدة عربية وقالت لنا انتبهوا على أغراضكم ولا تاخذوا معاكم أكل فوق لأن في بنت كان معها كيسة ساندوتش وجاء البابون وأخذ منها الكيسة ولمن لقاها مافيها أكل رجع وضربها .. فخذوا الحيطة لأنه من جد لمن طلعنا فوق لقيناهم ياكلوا من أكل الناس وواحد يشرب عصير من قارورة.

مطاعم كيب تاون :

• Mantra café 

جربنا الSpicy Lamb Curry وكان لذيذ 

• The red Herring :

جربنا منهم ٣ أنواع بيتزا :

- Margarita Pizza
- Mexican Pizzza

- Red herring Pizza

كانوا حلوين، وأحلاهم المارقريتا

• Belthazar :

(chicago, rib eye) جربنا هالنوعين وكلهم لذيذين مررة من أحلى الستيكس إلي ذقناهم

• Cinnabon :

لاازم تحلوا عليه مو طبيعي كيف طااازج

• San marco :

 ما ننصح فيه ، أقل من عادي (مطعم إيطالي) 

• Natasha :

 لذيذ وجلساته زي مطاعم الرياض المرتبة (جلسات الووتر فرونت هي الي حلوة أما جلسات كانال ووك أقل من عادية) 

lengini alfredo

san paulo 

* نصيحة  لا تطلبوا كوكتيلات من عندهم ڤيرجن لأنها مو حلوة بس باقي الطلبات كانت ممتازة

• Primi :

أكلهم كان لذيذ، بس صوص السلطة ما كان حلو، فسوينا صوصنا بالليمون والملح والفلفل وزيت الزيتون

chicken kebab

chicken and pesto pasta

green salad

• Mugg & Bread :

للأسف ما كتبت اسم الطلب، بس كان عبارة عن سلطة فيها أفوكادو، ذرة، طماطم، خيار، دجاج متبل ... 

بس كانت لذيذة السلطة

• Life Grand Cafe :  

زرناه مرتين بنفس اليوم، مرة جربنا وافل بالنوتيلا، ومرة جربنا هالحلى إلي بالصورة 

Nutella brioche 

انتبهوا من النورس .. لأنه فجأة نط على طاولتنا وأخذ حبة وافل وطار 

• Magica rome :

  ديكور المطعم قديم بس حميمي مليون، الخدمة عندهم خرااافية مو طبيعي كيف الوييترز رهيبين وكل شوية يجي الشيف ويتطمن لو عجبنا الأكل أو لا، واحتفلوا فينا من نفسهم لمن عرفوا إننا بشهر العسل، طلبنا سلطة وريزوتو بالزعفران واللحم ، صوص الريزوتو الصراحة كان لذيذ جدًا بس للأسف الرز كان مو مستوي زي ما إحنا متعودين ولمن سألنا الشيف عن السبب قال هذه هي طريقة الريزوتو الصحيحة في ايطاليا، أعتقد الباستا والمكرونة عندهم لذيذة كمان،

*  نقطة مهمة عندهم ساعات معينة للعمل فأحسن تتأكدوا من مواعيد العمل + تكلموهم تحجزوا لأن المطعم لمن رحناه كان زحمة مرة

وأخيرًا وليس آخرًا؛ التقييمات هي تقييماتي أنا وسلمان الشخصية، وكتبت عن الأشياء إلي جربناها بس.

هل أشوف الدولة مناسبة لشهر عسل؟
جدًا! البلد مرة حلوة ومختلفة عن أوروبا ولها جوها الخاص في حال كنتوا تحبوا الحيوانات لأن أغلب الفعاليات كانت روحات للحيوانات فحتكون وجهة مرة مناسبة بإذن الله

رُكام

بسم الله الرحمن الرحيم

السلام عليكم ورحمة الله وبركاته 

في نفس هذا الوقت من العام الماضي، كنتُ قد شعرت بالإنهاكِ الشديد، إنهاكٌ جسديٌّ، نفسيٌّ، ذهنيٌّ ووقتيٌّ أيضًا!
وكأني "أخطبوط" كلُّ طرفٍ منه يُسحب بقوة في الاتجاه المعاكس للطرف الآخر. أسابقُ نفسي دقيقةً بعد أخرى وأُأنب نفسي إن سقطت من شدة التعب بغير قصد. وأكثر ما كنت أتجاهله -عمدًا- هو أني بكل بساطة

 "تعبت"!

 تعبت من اللهث وراء الإنجاز، تعبت من تبعثر الأولويات، تعبت من شدة التفكير وشرود الذهن، تعبت من تقديم حاجات ثانوية على أمور أساسية.

حتى أيقنت -في وقتٍ متأخر-  أنه فعلًا "لا يُكلِّفُ الله نفسًا إلَّا وُسعَهَا" ، وأني قد حمّلت نفسي رُكامًا فوق وُسعها؛ فقررت مع بداية العطلة الصيفية أن أتخلص من هذا الركام شيئًا فشيئًا حتى أكون قد استعدت لياقتي الحياتية مع انتهائها.

* الركام ليس ركامًا ماديًا فقط، بل ركامٌ ماديٌّ، ذهنيٌّ، وبشريٌّ.

اكتشفت كل هذا الركام عندما وصلت للمرحلة التي اتضح لي فيها أني أصبحت كثيرًا ما أعطي ليس رغبةً في العطاء؛ بل رغبةً في إنجاز المهمة لا أكثر.


كيف تخلصت منه؟ بثلاث خطوات :

١/ تحديد الركام :

جلستُ مرةً مع نفسي جلسة مصارحة ووضوح؛ كتبتُ كل ما بذهني، أفكاري، طموحاتي، إنجازاتي التي أود تحقيقها على مختلف الأصعدة، إمكانياتي، وكل صغيرةٍ وكبيرةٍ تشغل وقتي، ومن ثم حددت الركام الذي سبب لي الإنهاك والذي كان سببًا في هذه الفقرة المهمة.
* قد تساعدك تدوينة "ميزان الكم والكيف" في تحديد الركام.

مثلًا :
- أغراض مبعثرة في الغرفة.
- عضويات ومشاركات في برامج ومراكز عدة تتطلب مني التزامًا يفوق طاقتي.
-  أحتاج أكثر من ٢٤ ساعة لأنجز مهامي اليومية "الطبيعية".
- علاقات كثيرة غير مصنفة كـ"معرفة، زمالة، صداقة .."
- تطبيقات وصور ومحادثات بالجوال كثيرة.
- رسائل بريدية كثيرة لم تُفتح منذ مدة.

وغيرها كثير ..


بعد تحديدها ننتقل للنقطة التالية ..

٢/ التخلص منه :

هذه الخطوة لا تأتي في يوم وليلة؛ بل تحتاج وقتًا وجهدًا و "قوَّة" لأننا سنتخلص من جزء كبير من حياتنا، أمور اعتدنا على ممارستها وكانت أساسيةً في مخططاتنا السنوية. حتى أتمكن من هذه النقطة قرأتُ عدة مقالات واستمعت إلى عدة مقاطع أجنبية على اليوتيوب لأشخاص جربوا التخلص من الركام ونشروا تجربتهم بتفاصيلها.
*المقاطع غالبها بعنوان : Declutter your life

 * التقويم من متجر سين @seendesign

بدأتُ أتخلص من الركام الذي كان يُثقلني واحدًا تلو الآخر،
بدءًا بالماديات المحسوسة بترتيب غرفتي، وتصفية عضوياتي ومشاركاتي والتزاماتي، وانتهاءً بالأمور التقنية بترتيب وتصفية جوالي من تطبيقات ومحادثات غير مقروءة.

حتى أكون صادقة؛ لم تكن الخطوة بتلك الروعة أثناء القيام بها، ولكن شعور صفاء الذهن وزيادة الوقت وانعدام وجود "تأنيب الضمير" تجاه المهام الغير منجزة أو المنجزة بأقل من الشكل المعتاد هو الشعور الذي كنت أفتقده منذ فترة.

لم أتخلص من الركام فحسب؛ بل رجعت إلى قوائمي التي كتبتها في الخطوة الأولى حتى أستطيع تحديد أولوياتي ومن ثم الموازنة بين جوانب الحياة بالشكل الصحيح -والمناسب لي-. حددت كل ما أردت القيام به على الفترات القصيرة المدى والطويلة المدى وتركت مساحةً حرة لأملأها بحسب ما يطرأ علي في وقتها.

والنقطة الأخيرة والأهم ..

٣/ اتخاذه كأسلوب حياة :

بعد التخلص من الركام، تأتي الخطوة الأهم والأصعب، وهي الحفاظ عليه واتخاذه كأسلوب حياة!
هنا نستطيع أن نقيس مدى التزامنا بهذه العادة في حال أعدنا الركام مرة أخرى وتركناه ينهش من طاقتنا، أو أنَّا استطعنا التخلص مما تراكم علينا بين الحين والآخر.

* رابط تحميل قائمة مهام الأسبوع : https://goo.gl/bpT2E6

ولتثبيت ورق القائمة مثل الدفتر من هنا

لم يمضِ وقتٌ طويل على تخلصي من الركام ولكني أستطيع رؤية الفرق أولًا على جسدي ونفسيتي، إنجازي لمهامي الروتينية البسيطة ومهامي الكبيرة، علاقاتي .. 

*التخلص من الركام دفعةً واحدة ليس بالسهل، بل وقد يؤدي إلى انتكاسة؛ الأفضل التخلص منها بهدوء وروية.

"إذا لم تستطع فعل أشياء عظيمة، فافعل أشياء صغيرة بطرق عظيمة"

عندك أفكار إضافيّة أو معلومات ممكن تفيدنا حول نفس الموضوع؟ أسعد جدَّا بكتابتك لها في التّعليقات!

"سبحانك اللّهمّ وبحمدك، أشهد أنّ لا إله إلّا  أنت، أستغفرك وأتوب إليك" 

ميزانُ الكم والكيف

الكم والكيف غالبًا ما تأتيان في الجملة ذاتها، ولكن هل يحملان المعنى ذاته؟

لا نقول متضادتين، ولا مترادفتين، بل نقول كلمتين مترابطتين في كثيرٍ من الأحيان وتحملُ كلٌّ منهما معنًى مختلف.

يقول ستيف جوبز :

"الجودة دائمًا تتفوق على الكم في الأهمية؛ فصنعُ شيءٍ واحد كامل أفضل من صنع شيئين ناقصين"

وحين ننظر بعمقٍ أكبر لمسؤولياتنا، مشاركاتنا، لأعمالنا، لعلاقاتنا، نرى طغيان كفّة الكم على كفّة الكيف. نحاول جاهدين جمع أكبر عددٍ من كلِّ شيء؛ ظنًّا منا أن هذا هو الصواب و"عين العقل"! وأن الذين لا يسلكون نهجنا ولا يحاولون خوض ذات السباق متأخرون عنا، متخلفون عن عصرنا، ولا يعرفون مصلحتهم. كثيرًا ما تجتاحني الرغبة في رفع هذا الغطاء الثقيل الشائك عن أنظارنا وأفهامنا، ونَفضَه ليزول كل ما يشوب فكرنا، ويعرقل مسيرتنا؛ كي تتضح لنا حقيقة كفتي الكم والكيف !

ما المقصود بكفتي الكم والكيف؟

• كفة الكم : هي أن ينصب تفكير الشخص على عدد الأعمال والعلاقات التي يقوم بها ويكتسبها بغضِّ النظر عن جودتها، ومدى فائدتها على المستوى الشخصي والمجتمعي.
• كفة الكيف : هي أن يكون التركيز الأول على الجودة وإتقان الأعمال والعلاقات التي يقوم بها الشخص ويكتسبها على الصعيدين الشخصي والمجتمعي.

كثيرًا ما نهتم لإثقال كفة الكم دون الكيف؛ بحجة أن هذا ما سيصقلنا، سيزيد من مهاراتنا، خبراتنا، فرصنا في سوق العمل، شغل أوقات فراغنا ... وغيرها من الأسباب الكثير. أصبح اللهث وراء المشاركات وتكوين العلاقات الكثيرة هو المطلب والمسعى، لا الوسيلة والطريقة التي ستساعدنا للوصول لغاياتنا الأسمى.

ما السبب الرئيس وراء ذلك؟

سوء إدراك المبدأ، الغاية، والمفاهيم هو ما أوصلنا إلى هذا الحد، هو ما جعلنا نترقب كل ما هو جديد، نبحث عن كل ما قد يزيد من رصيدنا متغافلين عن ماهية الرصيد نفسه.

كم منا تغريه كلمة :

"توجد شهادات"

إما لحضور الدورات أو لتنظيم فعالياتٍ معينة؟ لغاية الشهادة فقط؟ بغض النظر عن مدى فائدة الدورة أو مناسبة مُلقيها، وبغض النظر عن نوع الفعالية والهدف الذي تسعى لتحقيقه؟ كم منا أصبح هدفه قراءة أكبر عدد من الكتب بغض النظر عن الفائدة التي يتلقاها؟ وكم منا أصبح يبحث عما يشغل وقت فراغه، ليتفاخر به لاحقًا ويقول فعلتُ كذا وكذا؟

يقول عباس العقاد :

"اقرأ كتابًا جيدًا ثلاث مرات، أنفع لك من أن تقرأ ثلاث كتب جيدة"

لم يقلها لأننا لا نملك إلا كتابًا واحدًا، ولا لأن سقف أهدافنا وطموحاتنا منخفضين؛ قالها لأنه مدركٌ تمامًا هدف القراءة، مدركٌ أن الهدف من قراءة الكتاب هو الإحاطة واكتساب العلم الذي يحويه.

لو توقفنا لقليلٍ من الوقت وتأملنا حالنا ومآلنا؛ لرأينا كوضوح الشمس كيف أننا أصبحنا ننقادُ مغسولي الدماغ وراء كل سيل يمرُّ من أمامنا.

هل خلاصة حديثي أن ننقد حالنا ونجلس مكتوفي الأيدي ونتأمل من نوافذ منازلنا كلَّ من يعبر الشارع؟ أن نكتفي بكتابٍ واحد طوال حياتنا، وأن نعيد قراءته مرارًا وتكرارًا حتى نحفظه عن ظهر قلب؟ أن نقطع علاقاتنا مع الناس وننعزل عنهم؟ أن نترك كل ما كان يملأ أوقات فراغنا ونضع اليد على الخد؟

أبدًا! 

"الفرص تمرُّ مرَّ السحاب؛ فانتهزوا فرص الخير"

كيف لنا أن نصل لهذا المستوى من الاختيار الجيد؟

بأن نعرف أهدافنا وغاياتنا ونحددها بوضوح، ومن ثم نختار الفرص التي ستساعدنا لتحقيق الأهداف، كمثال :

• هدفي إثراء معرفتي في مجال تخصصي > أُسجل في دورات ومحاضرات في ذات المجال بعد أن أبحث عمن سيقدِّم اللقاء للتأكد من أني سأخرج من اللقاء بفائدة لا صفر اليدين.

• هدفي أن أصبح اجتماعية وأحظى بعلاقات قوية > أكوِّن علاقات مع من هم حولي، ولكن لا أحاول الدخول بعمقٍ في كل علاقة، بعد فترة سأعرف أيُّ العلاقات التي يجب أن أحتفظ وأتشبّث بها، وأيُّها من الأفضل أن أُسطِّحها قدر الإمكان وألا أجعلها تأخذ حجمًا أكبر مما تستحق.

• هدفي الحصول على وظيفةٍ مرموقة > أركّز على التطوع والمشاركة والتدريب فيما سيساعد من رفع مستواي وزيادة خبراتي ومهاراتي التي أحتاجها في تلك الوظيفة. أن أنوع بين المشاركات، ما بين إدارةٍ، وتنظيمٍ، وتخطيطٍ، وإشرافٍ، وأن أركِّز على جودة كل ما أقدمه وما أكتسبه.

قد تفيدك تدوينة  :  "كيف نحقق أهدافنا؟ + قوائم جاهزة للطباعة"

"النفس إن لم تشغلها بالطاعة؛ شغلتك بالمعصية"

المهم أن يوازن الإنسان بين الكفتي بحيث لا تطغى إحداهما على الأخرى. والذكاء أن يعرف الإنسان على أيِّ العلاقات يحافظ، وفي أي الأنشطة يُشارك، وأن يعرف كيف يستثمر وقته بما يفيده حقًا لا كيف يشغله وحسب. 

"إذا لم تستطع فعل أشياء عظيمة، فافعل أشياء صغيرة بطرق عظيمة"

أسعد بتعليقكاتكم ومشاركة إثرائكم!

"سبحانك اللّهمّ وبحمدك، أشهد أنّ لا إله إلّا  أنت، أستغفرك وأتوب إليك" 

كيف نحقق أهدافنا؟ + قوائم جاهزة للطباعة

بسم الله الرحمن الرحيم 

السلام عليكم ورحمة الله وبركاته 

مع بداية السنة والفصل الدراسي الجديد والتجارب الجديدة إيش أكثر شيء يساعدنا على الإنجاز؟ أكيد التخطيط الجيِّد!

من أكثر الأسئلة إلي تجيني كيف تنظمي وقتك؟ كيف تنجزي أشياء إضافة لدراستك ولحياتك الشخصية؟ 

ببساطة .. بس بالتخطيط الجيد للوقت . 

بعيدًا عن المثالية : حياتي ويومي مو كلهم ماشيين بالتخطيط والترتيب، ومو دائمًا ألتزم بخططي، ومو دائمًا أحقق كل أهدافي الشهرية، السنوية .. بس دائمًا أحاول قدر الإمكان إني ألتزم بالخطط إلي أحطها لنفسي، وقد ما أقدر أحاول أخلي خططي وجدولي مرنين، ليش؟ عشان في حال طرأ أي طارئ، حصل أي ظرف، قررت أي قرار مفاجئ ما تتلخبط كل خططي وتروح كلها سُدى! 

 ودائمًا لما أحس بالتعب أو بالفتور أذكر نفسي وأشحذ طاقتي بمقولة :

"إن تعبت في الخير؛ فإن التعب يزول والخير يبقى" 

سمعتوا عن تحليل S.O.W.T للأهداف؟ 

هذا التحليل يساعد في تحقيق الأهداف، غالبًا يُستخدم في قياس مدى نجاح المشاريع الناشئة وفي التسويق وغيرها من المجالات .. 

وأشوف إنه طريقة فعالة جدًا لتحليل الأهداف الشخصية بشكل منطقي وواقعي خصوصًا للناس إلي مو متعودين على تحديد أهداف والتخطيط للوصول لها.

هذه الصورة  تشرح فكرة التحليل بكل اختصار

كيف يساعدنا هذا التحليل على تحقيق أهدافنا؟ نسوي نفس هذا الجدول لكل هدف ونبدأ نقيس نقاط القوة والضعف والفرص والمخاطر المتعلقين بهذا الهدف، وبعدين نشوف نقاط قوتنا ونعززها، ونقاط ضعفنا نطلع لها حلول وأهداف صغيرة تخلينا نحولها لنقاط قوة، والفرص كيف ممكن نستغلها والمخاطر كيف ممكن نتجنبها بأكبر قد ممكن! 

مثال بسيط عشان توصل الفكرة بشكل أوضح :

الهدف : زيادة ثقافتي حول تخصصي بقراءة كتاب ومقالات متعلقة فيه خلال سنة ٢٠١٨.

(كل نقطة نذكرها لازم نحط لها شيء مقابلها)

* نقاط قوة : 

- لغتي العربية جيدة > أتعلم مصطلحات عربية جديدة علي  في تخصصي 

- لغتي الإنجليزية جيدة > أتعلم مصطلحات إنجليزية جديدة علي في تخصصي

- سريعة في القراءة والفهم > أستغل كل الأوقات إلى أقدر أقرأ فيها

* نقاط ضعف :

- ما ألتزم بالشيء > أبدأ عالخفيف، مثلًا مقال أسبوعيًا وكل ما قرأت أكافئ نفسي بشيء بسيط لو حتى كوب قهوة! ومتى ما حسيت إني خلاص اتعودت على مقال أسبوعيًا أبدأ أقرأ اثنين أسبوعيًا وهكذا ..

* فرص : 

- أقرأ بين المحاضرات في الجامعة وفي أوقات الانتظار > دائمًا يكون معاي بالجوال محتوى جاهز أقدر أقراه في أي مكان

- أسوي تحدي مع صحباتي ونتابع إنجاز بعض > نسوي قروب وكل أسبوع وحدة مننا ترسل لنا المقال إلي لازم نقراه، وممكن نهاية كل أسبوع نتناش في نفس المقال إيش عجبنا وإيش ما عجبنا

* مخاطر : 

- ما أحصل مصادر موثوقة ولغتها واضحة وسلسة > أستشير أحد متخصص، مثلًا صديقة لها خبرة، دكتورة في الجامعة ..

- تجيني تحبيطات من إلي حولي بمعنى : "لاحقة على الشقاء بعد التخرج" > أدخل كلامهم من أذن وأطلعه من الثانية :)

صحيح العملية قد تكون طويلة نوعًا ما، بس لو سويناها بالبداية في كم هدف واتعود عقلنا على تحليل الأهداف بهذه الطريقة بعدين لما نحط أهداف ثانية ما حنحتاج نسويها بهالتفصيل لأننا خلاص اتعودنا نشوف إيش عندنا وينقصنا فبمجرد كتابة هدف حتسهل علينا تحديد الأهداف الصغيرة إلي حتوصلنا لهدفنا الأول بإذن الله!

وعشان الأهداف بعيدة المدى تتحقق لازم يكون عندنا أهداف قريبة المدى توصلنا لها .. والتخطيط اليومي والأسبوعي لهذه الأهداف الصغيرة يساعدنا كثيير في تحقيقها! 

بشارككم تصميمين بنفس ثيم تقويم ١٤٣٩، إلى ما شاف التقويم ممكن تطلوا عليه من هنا.

التصميم الأول عبارة عن قائمة مهام يومية

التحميل من هنا

التصميم الثاني عبارة عن خطة أسبوعية وفيها مساحة للمهام إلي لازم ما ينتهي الأسبوع إلا وإحنا منجزينها

التحميل من هنا

كيف نقدر نسويهم زي الدفتر؟ الطريقة موجوة هنا

"إذا لم تستطع فعل أشياء عظيمة، فافعل أشياء صغيرة بطرق عظيمة"

أسعد بتعليقكاتكم ومشاركة إثرائكم!

"سبحانك اللّهمّ وبحمدك، أشهد أنّ لا إله إلّا  أنت، أستغفرك وأتوب إليك" 

تقويم ١٤٣٩هـ صار جاهز للطباعة!

بسم الله الرحمن الرحيم

السلام عليكم ورحمة الله وبركاته 

كعادة كل سنة أشارككم تقويمي السنوي؛ سألتكم ببداية شغلي عليه عن أفكار ملهمة ممكن تفيدني وقت التصميم .. إيش ممكن أخليه يشمل؟ استلهمت من أفكاركم وأفكار في بالي من أول .. حرصت جدًا ما أكثّر ورق زي السنوات إلي راحت عشان فعلًا نستمر باستخدام التقويم وما نتركه كم شهر مركون على الطاولة زي ما كثير قالوا لي!
إذا تبغي أفكار تساعدك في تنظيم وقتك أكثر .. ممكن تلهمك هالتدوينة : http://reemalmaiman.blogspot.com/2016/11/blog-post.html

لا لن يُغيَّر حالنا .. إن لم نغيِّر أنفسنا !

حرصت إنه تكون هالعبارة شعار التقويم؛ مع إني ما كتبتها من ضمن الصفحات، بس استلهمت فكرة كل قائمة وكل ورقة منها تقريبًا بحيث إنه يساعدنا على التغيير للأفضل، من ناحية الانضباط بالمهام والمواعيد، الصرف، اكتساب عادات وترك عادات .. عشان لما نطلع من سنة ١٤٣٩ نطلع أشخاص أفضل!

بدايةً .. أجندتي من متجر غراس اسمها (أيام) متوفرة بألوان مختلفة، بالنسبة لي أحسها مناسبة لاحتياجي تمامًا، لأنها عربية من اليمين، وفيها جيوب ومكان للقلم، وحجمها حلو وجلدها يتحمل يعيش، هذه ثاني سنة أستخدمه ومازال كأنه جديد.
تقدري تطلبيها من موقعهم لو عجبتك : https://gheeras.sa/store/
سعرها : ٩٨ ريال

بعطيكم فكرة بسيطة عن كل صفحة عشان تكون واضحة الصفحات أكثر :

أهداف السنة : 

هنا نحط الأشياء إلي ما نبغا سنة ١٤٣٩هـ تنتهي إلا وبإذن الله إحنا منجزينها ومنتهين منها! 

* فائدة في التخطيط عشان ننجز بشكل أكبر وسلس أكثر : نكتب أهدافنا الكبيرة .. وفي كل شهر نكتب الأهداف إلي تساعدنا على تحقيق هذا الهدف الكبير .. 

مثال : هدفي خلال السنة أقرأ ١٢ كتاب .. بالتالي هدفي كل شهر أقرأ كتاب واحد .. النتيجة لو التزمت حيتحقق الهدف على نهاية شهر ١٢! وهكذا مع باقي الأهداف. 

الأشهر :

هذه الورقة أشبه بخريطة للشهر نرتب فيها الأحداث والمواعيد والمناسبات المهمة عشان يصير عندنا تصور أوضح عن الشهر.

أهداف الشهر : 

هنا نقدر نقول إنها أهداف تساعدنا على تحقيق أهداف السنة؛ أوضح بالشرح إلي فوق.

تتبع الصرف الشهري :

هذه الورقة أحسها أهم ورقة بالتقويم كله؛ لأن كثير مننا -وأولهم أنا- ما نعرف نتحكم بصرفنا الشهري .. ونصرف ونمشي وبعد فترة نتحسف إنه ياريتنا حسبنا لصرفنا أكثر ورتبنا له، فالفكرة إننا نحصر دخلنا الشهري (مهما كان قليل) وبعدها نراقب صرفنا في الأشهر الأولى .. كل ما اشترينا شيء نكتبه ونكتب سعره .. وبعدها نصير عرفنا بإيش نصرف الفلوس وحيسهل علينا تقسيم دخلنا من صرف وإدخار بتفاصيل أكثر.

تتبع العادات :

هذه من أكثر الأفكار إلي لو فعلًا طبقناها باستمرار والتزمنا فيها حنشوف نتيجة جبارة بإذن الله!

الفكرة إننا نكتب عادات نبغا نكتسبها وعادات نبغا نتخلص منها، بعدها كل يوم نلون المربع إذا فعلًا سوينا تصرف يساعدنا نكتسب هالعادة أو نتخلص منها .. ونهاية كل شهر نشوف مدى التزامنا بهالشيء! 

وعشان نرضي جميع الأطراف .. 

جهزت لكم ٣ روابط لنفس التقويم تقدروا تختاروا منها الأنسب لكم: 

١. طالبات الجامعة : https://goo.gl/UGXWMc

٢. طالبات المدرسة : https://goo.gl/PF9WYE

٣. الخريجات : https://goo.gl/bD9SRg

نقطة مهمة .. الطباعة قد تكون شوية صعبة لأنها وجه وظهر .. فلو طابعتك فيها هذه الخاصية حتريحك كثير .. ولو كانت طابعتك زيي مافيها حتضطري تطبعي صفحة وتدخليها بدرج الورق وهكذا إلى أن تخلصي التقويم ..

بالنسبة لإعدادات الطباعة أهم شيء تختاري إنها تكون بالعرض Landscape وتختاري Actual size عشان تطلع مضبوطة معاكِ من ورى وقدام.

تعرفي أحد يهتم بهالأشياء ويحتاج تقويم؟ ارسلي لها الرابط وخليها تستفيد!

"إذا لم تستطع فعل أشياء عظيمة، فافعل أشياء صغيرة بطرق عظيمة"

عندك أفكار إضافيّة أو معلومات ممكن تفيدنا حول نفس الموضوع؟ أسعد جدَّا بكتابتك لها في التّعليقات!

"سبحانك اللّهمّ وبحمدك، أشهد أنّ لا إله إلّا  أنت، أستغفرك وأتوب إليك"