الأمان المطبخي ١٠١ | أو باسم ممل أكثر فرزنة الأكل

بسم الله الرحمن الرحيم 

السلام عليكم ورحمة الله وبركاته 

تدوينة بمحتوى مقارب لهذه التدوينة الصراحة توقعت أحصلها موجودة بحسابات ومدونات عدة أشخاص، بس للأسف كل إلي حصلته كانت عبارة عن معلومات متطايرة وبعضها تروح بعد ٢٤ ساعة زي ستوري انستقرام وسناب تشات، ولأني من جد جلست فترة طويلة أبحث وأدور وأجرب عدة أفكار قلت أسهِّل على غيري عناء البحث وأرتبها لكم في تدوينة يسهل الرجوع لها، وكل ما أجرب فكرة جديدة مناسبة للتطبيق وتخدم نفس الهدف بضيفها على هذه التدوينة، يعني بإذن الله هذه التدوينة حتتحدث كل فترة والثانية فكل ما فضيتوا ارجعوا شيكوا عليها. 

 وشكله مدونتي حتقلب تدوينات ربات منزل آخر شيء ️

أنا أحب الطبخ، وأستمتع فيه جدًا الحمدلله، بس بعد الزواج وبعد ما صار جزء لا يتجزأ من نمط حياتي اليومي وروتيني، شفت إنه مو عملي أبدًا -بالنسبة لي- إني أجلس بالمطبخ ساعتين أو أكثر يوميًا ما بين تجهيز وتقطيع وتنظيف وطبخ ... 

فإلي صار، صرت أبحث بشكل دوري عن طُرق تسهل علي حياتي المطبخية أقدر أسميها عشان ما أفقد لذة الطبخ لمن أشوفه ياخذ وقت مرة كثير من يومي وأنا عندي عدة أشغال ومهام غيره.

هذه التدوينة عبارة عن أفكار تختصر وقت الطبخ، وتخدمك لمن تقرري في آخر لحظة إنك تطبخي شيء ما كنتِ مجهزته مسبقًا، وأخيرًا وليس آخرًا تساعد بالاستفادة من المكونات الي ممكن تخرب لو ما استخدماناها خلال كم يوم.

يعني باختصار .. تحسسني بالأمان المطبخي

طيب بسم الله  نبدأ الآن في صلب الموضوع !

لازم بالبداية نفهم أشياء أساسية عن فرزنة الأكل من ناحية علمية عشان نتأكد إننا جالسين نفرزن بالطريقة الصح والي تحافظ على قيمة الأكل الغذائية ومو بس نفرزن لمجرد الفرزنة. 

الحرارة، الوقت، الهواء كل هالثلاثة أعداء للفرزنة! 

إيش يعني؟ يعني إنه الأكل وهو ساخن خطأ تدخليه الفريزر لأنه يفقد قيمته الغذائية ويأثر عليه بشكل سلبي، الصح إننا نتركه إلين ما ياخذ درجة حرارة الغرفة بعدين نفرزنه، أما الوقت فيعني إنه في بعض الأكلات تحتاج تدخليها بسرعة للفريزر ولا ما حتتفرزن بالشكل الصحيح مثل : فرزنة أي نوع عجينة فيها خميرة، لازم تتفرزن قبل ما تتخمر مو بعد، والشيء الأخير إنه أي شيء نحطه بالفريزر لاازم نتأكد إنه مفرغ تمامًا - أو قدر المستطاع من الهواء عشان ما يأثر على جودته (موضوع الهواء نستثني منها السوائل، لازم أي سائل نفرزنه نترك معاه شوية هواء لأنه السائل بعد ما يتجمد ياخذ مساحة أكبر من مساحته وهو سائل).  

إيش أفضل؟ أفرزن في علب ولا في أكياس؟ 

الأكياس طبعًا، أولًا لأنها ما تاخذ مساحة كبيرة زي ما العلب تاخذ مساحة، ثانيًا إنه الأكل يتجمد في الأكياس أسرع مرتين ويذوب أسرع مرتين من العلب، هالخطوة مو بس أسرع وأقل استهلاكًا للمساحة، كمان تساعد إنه الأكل يحافظ على جودته أكثر. 

نقطة أخيرة مهمة، مهمة جدًا!

مهم إننا نقسم المفرزنات كل كيس يمثل استخدام واحد، لأن الأكل المفرزن إذا دخل وطلع أكثر من مرة ما يحافظ على جودته سواء طعمًا أو قيمة غذائية، فالأفضل يتقسم من البداية قبل ما يتفرزن على حسب الاحتياج.

وهذه بعض أفكار فرزنة الأكل إلي جربتها وسهلت علي حياتي :

* الثوم المهروس : 

ممكن ينهرس بالهاون أو بالفود بروسيسر، أو الخلاط إذا كان فيه خواص الفود بروسيسر بعد ما يتقشر وينغسل كويس طبعًا

بعدها نفرد الثوم قدر المستطاع في كيسة محكمة الإغلاق عشان ما تصير ريحة الفريزر ثوم، وطبعًا قد ما نقدر نفرغها من الهواء.

نجي للخطوة الرهيبة!

نستخدم الجهة اللي مو حادة من السكين عشان نسوي مربعات بمقدار الكمية اللي نحتاجها في كل طبخة 

(إذا البيت فيه ٦ أشخاص فحجم المربع أكبر من حجم المربع للبيت إلي فيه شخصين أو ثلاثة) فحجم المربعات على حسب احتياجك انتِ.

بالأخير يطلع شكلها كذا، ونحطها بالفريز مباشرة بشكل مسطح  مو واقفة إلين ما تتجمد بعدين نحطها زي ما نبغا بالفريزر.

وقت أي طبخة بس نكسر المربع من برى والكيس مسكر وحينكسر معانا مضبوط وينضاف للطبخة.

وأهم نقطة في هذا الثوم، إنه ما يحتاج تخليه يذوب، خلاص مباشرة تكسريها وتحطيها في الطبخ وترجعي الكيس للفريزر.

* عصير طماطم :

هذه الحركة أسويها في حالتين، الأولى إنه الطماطم صار شوية طري فما ينفع للسلطة، والثانية لمن يكون عندي طماطم كثير فأوفر على نفس توصيخ الخلاط في الطبخات القادمة وأجهز الطماطم من الحين.

فالفكرة ببساطة إني أعصر طماطم وأحطه بأكياس بالضبط على قدر احتياجي في كل طبخة.

وأحطها بالفريز مسطحة إلين ما تتجمد وبعدها أخليها واقفة مع بقية المفرزنات.

* الزنجبيل :

الزنجبيل من الأشياء إلي ريحتها قوية، وغالبًا بآخر لحظة أقرر أسويه، فأسهل طريقة بدل ما يكون بقشرة ولسا يبغاله تقطيع إني أجهزه من بدري

نقطعة أو نهرسه أو نبشره - يعتمد على تفضيلك انتِ-  بالحجم إلي نبغاه سواء للطبخ ولا لمشروب 

وينحط في أكياس نحاول نفردهم فيها وقدر الإمكان نفرغها من الهواء وأهم شيء الكيس يكون فيه الكمية إلي نحتاجها لاستخدام واحد مو أكثر من استخدام.

* صلصلة باستا أو بيتزا :

من أكثر الأشياء إلي تفك أزمة، خصوصًا لمن نقرر ناكل ومافي شيء مجهزته من بدري، الطريقة إني أسوي الصلصة بالطريقة إلي أحبها مع كل المكونات وكل شيء بحيث تكون جاهزة للأكل بعدها تتقسم في أكياس حسب مقدار كل طبخة.

وبنفس الطريقة أفرد الكيس ما أخليه متجمع في مكان واحد، لأنه أسرع بالتجميد وأسرع بالذوبان وحتى في استغلال مساحة الفريزر.

وقت ما أطلعها من الفريزر بس أسلق مكرونة وأسخن الصلصة أحيانًا أشتهي أزود عليها مثًلا لحم مفروم أو بهار معين أو شطة، فوقتها أزودها، ونفس الشيء ينطبق لصلصة البيتزا.

* الخبز :

فرزنة الخبز أتوقع هذه من الأشياء إلى مافيها بيت يخلو فريزرهم منه، من زمان كنت أطلّع الخبز من الفريزر وأسخنه على طول .. بس اكتشفت مؤخرًا إنه هذه الطريقة غلط.

الصح إني أول شيء إنه الخبز يتقسم  كل مقدار استخدام واحد في كيس منفصل، الشيء الثاني ما يتسخن الخبز قبل ما يذوب الثلج تمامًا منه عشان يطلع بعد التسخين كأنه طازج وما يطلع بارد ولا ينشف بسرعة.

الأفضل في التسخين إما بالفرن أو على النار، ممكن بالمايكروويف بس حيخليه مجلد شوية.

*مرقة الدجاج :

من الأشياء إلي لازم تكون عندي بالفريزر ومتى ما خلصت أسوي غيرها على طول مرقة الدجاج، لأنه أحيانًا أبطّل عن طبخات عشان أعرف إني باخذ وقت بالسلق قبل ما أبدأ بالطبخة الأساسية

وبنفس الطريقة أقسم المرق على مقدار استخدامي لطبخة وحدة وأحطها مسطحة في الفريزر إلين ما تتجمد. 

* الدجاج المسلوق :

بعد ما سلقت الدجاج وفرزنت مويته، إلي أسويه إني أفتت الدجاج بالشوكة أو بيدي بهالطريقة وأقسمها في أكياس.

بإيش ممكن أستخدم هذا الدجاج؟ شوربات، ملوخية، ساندوتشز دجاج، صينينة خضار بالفرن ... 

أحسن شيء إنه مطبوخ وجاهز فبس يحتاج منك تبهير 

* شيش طاووق : 

الشيش طاووق كمان من الحلول إلي تفك أزمة فرزنتها، بس هالمرة فرزنتها بشكل مختلف عشان أستغل مساحة الفريز قدر المستطاع وما أحط كل الصواني حقتي في الفريزر ويصير ما عندي شيء فاضي أقدر أطبخ فيه أشياء ثانية.

الطريقة إني حطيت المقدار الأساسي إلي أسويه بالأيام العادية في صينية، وفوقها قطعة قصدير وفوقها مقدار ليوم ثاني  

بعدين تنحط فوق الصينية، بحيث تفصل المقدارين عن بعض، وما أضطر أخرب جودة الشيش طاووق لمن أطلع كل الصينية وأنتظر الثلج يذوب عشان أفصل كل مقدار عن الثاني

كذا لمن أبغا أسوي شيش طاووق أجيب صينية فاضية وآخذ إلي فوق القصدير من وهو بالفريزر وخلصنا. 

الأكياس إلي أستخدمهم من إيكيا، غالبًا أستخدم الحجم الصغير والوسط، بس أحيانًا أستخدم أحجام أكبير، أحب حقت إيكيا خصوصًا إنه كل مقاس لون فأسهل علي في إني أعرف أي حجم أنسب للي بحطه فيه، وكل ما رحنا أجيب منه كميات عشان ما يخلص في وقت حرج

 لو ما ناسبتكم في نوع ثاني كثير قرأت عنه مدح ومخصص للفريزر هذا هو : 

ما قد جربتها فما أقدر أحكم عليها، ولا أعرف من وين، بس أتوقع بالسوبرماركتس موجودة.

وبكذا نكون خلصنا بعض أفكار الفرزنة، هذا الموضوع حيتحدث بين فترة والثانية كل ما جربت طرق جديدة ولا أفكار جديدة بإذن الله بحيث تكون كلها محفوظة في هذا المرجع ويسهل الوصول لها.

قوالب بيكارب لرائحة ثلاجة أفضل

بسم الله الرحمن الرحيم

السلام عليكم ورحمة الله وبركاته

مؤخرًا، بعد ما صار لي مطبخي الخاص وصرت مسؤولة عن أهتم التفاصيل بدأت أدور حلول للمشاكل إلي تواجهني عشان تسهل علي حياتي وبنفس الوقت تخلي أدائي أفضل.

رائحة الثلاجة كانت من أحد الأمور إلى أبغا حل عملي لها ما يضطرني كل شوية أطلع إلي فيها وأغسلها، فالحل كان بالبداية صرت أستخدم علب محكمة الإغلاق عشان أتأكد إن الأكل ما تطلع ريحته من العلبة، والشيء الثاني كنت أستخدم بيكربونات الصودا لأنها معروفة في إنها تسحب الروائح سواء كانت تطلع من الأحماض (زي الحليب) أو من القواعد (مثل اللحوم).

محور حديثنا هو هذه القوالب، بس خلونا نرجع بالقصة من ورى شوية ..

في البداية استخدمت تعليقة البيكنق صودا هذه، تجلس لشهر كامل في الثلاجة بعدين يخلص مفعولها؛ الصراحة كانت خيار ممتاز جدَّا أولًّا لأنها ما تاخذ مساحة بالثلاجة بس تتعلق في أي من جدران الثلاجة إضافةً إلى إنها ما توصخ الثلاجة بعكس خيار علبة البيكنق صودا المفتوحة إلي مممكن أي حركة تخليها تنكب وتحوس الثلاجة.

بس طبعًا .. لازم أسوي الشيء بنفسي عشان أنبسط وأقلل من الاستهلاك فقعدت أبحث عن حلول ولقيت حركة فنانة، وهي قوالب من البيكنق صودا تنحط في الثلاجة وتتغير كل شهر تقريبًا، وهطريقتها جدًا بسيطة ما تاخذ منك ٥ دقايق

الطريقة كالآتي:

نحتاج :

- نصف كوب بيكربونات الصودا

- ربع كوب ماء فاتر

- ٨ قطرات زيت عطري (أي رائحة تحبوها) أنا استخدمت اللافندر وكانت النتيجة حلوة

نخلطهم سوا إلين ما يتكون عندنا قوام ثقيل شوية (مو مرة ثقيل وبنفس الوقت ما يكون مرة القوام باودري)

القوام المطلوب  أوضح بهذه الصورة 

بعدها نعبي قالب الثلج بالخليط إلي سويناه، اختيار القالب يعتمد على حسب رغبتك في حجم القوالب إلي تبغيه أنا فضلت تكون صغيرة وشكلها حلو فاخترت قالب ورود؛ بعد ما عبيت القالب كامل ضغطت عليهم كلهم عشان أتأكد إنها تتماسك كويس لأننا حنتركها تجف تمامًا قبل ما نستخدمها.

الحين بعد ما خلصنا من ضغطها تمامًا، نتركها في مكان جاف من يومين إلى ثلاثة أيام.

الآن جاءت لحظة الحقيقة، طلعت قوالب بيكربونات الصودا بالراحة عشان ما تتكسر، كل إلي علي إني أحط وحدة أو أكثر بالثلاجة وأنساها إلين ما يمر عليها تقريبًا شهر أو أرجع أشم ريحة في الثلاجة وأقوم أستبدلها بوحدة جديدة.

طيب باقي القوالب إيش أسوي فيهم؟

نحفظهم في علبة محكمة الإغلاق وفي مكان جاف إلى إشعارٍ آخر لمن نحتاج نبدل إلي بالثلاجة.

ليش قررت أسميها قوالب بيكارب؟ لأن بيكارب اختصار لاسم بيكربونات الصوديوم. 

هاكونا ماتاتا : رحلة جنوب أفريقيا

بسم الله الرحمن الرحيم 

السلام عليكم ورحمة الله وبركاته 

نظرًا لكثرة الأسئلة وطلب مقترحات لجنوب أفريقيا قررت إختصارًا للوقت وعشان تكون مرجع محفوظ دائمًا إني أكتب تفاصيل رحلتنا والتقييمات في تدوينة يسهل الرجوع لها 

بعض التفاصيل المهمة عن رحلتنا :

• الفترة : June-July 2019
• الجو : بداية الشتاء (وقتها ما كان البرد قارص، بس مرة كان حلو يبغالكم تدفوا شوية) 
• المدة : أسبوعين ونصف تقريبًا
• الانترنت :  أخذت شريحة بيانات من ڤودافون أول ما نزلنا في مطار جوهانزبيرق فيها ١٠ قيقا كفتني قرابة ١٥ يوم ولا قطعت علي أبدًا وأنا أستخدم كل برامج التواصل إلا اليوتيوب أستخدمته شوية بس، كانت تقريبًا ب١٧٠ ريال أو حولها.

بالبداية بحكيكم عن كم نقطة حبيناها في البلد بشكل عام، الشعب و ن ي س مليون مو طبيعي كيف تمنيت أجيب منهم شوية للسعودية؛ يحبوا الرقص والمزح والطقطقة ونفسهم خفيفة مرة وكنا ما نركب مع سواق إلا نقعد نسولف معاه إلين ما نوصل لوجهتنا. في نسبة لا بأس بها من المسلمين سواء كانوا جنوب أفريقيين الأصل أو من السكان بشكل عام خصوصًا في كيب تاون. ما شفت منهم أي مضايقات تجاه الحجاب لا لي ولا لغيري وكمان في من نفس البلد في كيپ تاون تحديدًا عدد من البنات محجبات فموضوع الحجاب والإسلام مُحترم عندهم الحمدلله. البلد نظيفة أكثر مما توقعت سواء شوارعهم أو الأسواق أو حتى دورات المياه العامة ! تفاجأنا إنه حتى دورات مياه المحطات نظيفة جدًا تبارك الله ! ويهتموا بإعادة التدوير بشكل خيالي كل شيء عندهم مُعاد تدويره، البلد رخيصة بشكل خرافي! البلد بشكل عام يغلب عليها مناطق الحيوانات فلو كنتوا من محبي الحيوانات مثلي حتكون التجربة لا تنسى ! 

نصيحة مهمة .. الجزم إلي تحبوها وتخافوا تخرب لا تاخذوها معكم إلا لو بس حتلبسوها في السوق والمطاعم لأن غالب الأماكن موية وتراب وطين وحصى والجزمة حتنعدم فيها، عندي جزمة مسميتها جزمة السفاري ومن جد من أكثر الأشياء إلي حمدت ربي عليها لأنها ما تزحلق ومناسبة جدًا للغابات والهايكنق، اشتريتها من تمبرلاند أتوقع بحدود ال٣٠٠ ريال  أو حولها

المناطق إلي زرناها :

• Johanezburg :

الأوتيل : Saxson 

ي م و ت الأوتيل كأنه في غابة حلو للتمشاية فيه مرة، والغرف حلوة مرة وطابعها أفريقي فخم، بس إلي ما عجبنا فيه إنه دورة المياه مو مرة فيها خصوصية بس غير كذا الاوتيل مرة حلو .

*الصور من موقع الأوتيل

الوافل إلي باليوقرت في فطور الأوتيل كان لذيذ مرة

بشكل عام جوهانزبيرق غالبًا ما يُنصح بزيارتها إلا لو ليلة وحدة بس تريحوا لأنه مافيها شيء الصراحة وهي أكثر بلد خطر من ناحية السرقات ( السرقة إلي يوقفك واحد ويخليك تطلع كل إلي معاك) ! الحمدلله ما تعرضنا لشيء بس معروف عنها هالنوع من السرقات؛ وتحسبًا لهذا الموضوع جبت شنطة "rattan bag"خصيصًا لجوهانزبيرق عشان ما أعرض نفسي للسرقة، طلبتها من أمازون وفي منها عدة أشكال مربعة ودائرية وممكن تضيفوا معها سكارفات مختلفة تحلي شكلها

اخترت تقريبًا أكبر وحدةة حجمًا، وكانت تكفي : كارد هولدر، جوال، شاحن متنقل وسلك ، روج، مرطب، كريم يد، علك وفيها شوية مساحة زيادة 

رابط الشنطة من أمازون :  https://www.amazon.com/gp/product/B07GCPF7GY/ref=ppx_yo_dt_b_asin_title_o00_s00?ie=UTF8&psc=1

في عندهم ساحة نيلسون مانديلا حلوة وفيها مطعم ستيك لذيذ اسمه The Big Mouth جربنا من عندهم نوعين ستيك وكانوا مرة لذيذين باقي الأشياء ما جربناها، وبنفس الساحة لو تمشيتوا فيها ممكن تدخلوا على مول -ما حتستوعبوا إنكم دخلتوا المول إلا لو شفتوا اللوحات أو سألتوا-،  فيه دور فيه تقريبًا محلات كل الماركات بولقري، كارتييه، أرماني، ال في ... هذا تقريبًا أحسن مول زرناه في جنوب أفريقيا كلها فلا ترفعوا سقف التوقعات في التسوق. 

بعدها سافرنا بالطيارة على جورج واستأجرنا منها سيارة، طلعنا على القاردن روت بالسيارة؛ القاردن روت هي عبارة عن منطقة فيها مدن زي لمن نقول الحجاز فيها مكة وجدة والمدينة ... 

• The Garden Route - Wilderness : 

الأوتيل : the view boutique & spa 

الاوتيل رااايق مررة ومطل على البحر وصعنطوطي مرة ويعطي شعور حميمي، كنت بجرب السپا بس للأسف كل اليومين إلي جلسنا فيهم كانوا fully booked بس شكله مرة حلو الصراحة فلو حصل لكم فرصة جربوه وقولولي كيف يكون.

*الصور من google

جربنا مطعم لا ننصح فيه أبدًا اسمه Zucchini .

وباقي أكلنا كان بالأوتيل (البانكيك بالفطور كان حلو إلي باليوقرت والتوت، بس الشكشوكة ما ننصح بتجربتها لأنها كانت عبارة عن إيدام غريب) 

•  Redberry Farm :

من الأماكن الحلوة الي رحناها هي مزرعة الفراولة،  بس ما حتاخذوا فيها وقت طويل بالكثير 15-30 دقيقة ولو مططتوا الوقت حتصير 45 دقيقة، اللاتيه بالكافيه حقهم كان خفيف ولذيذ.

هذه اللوحة تمررا صحن الفراولة منها عشان يتأكدوا إنكم ما تجاوزتوا الحد المسموح من الفراولة

• National Park :

 ت م و ت مو طبيعي الترتيب والتنظيم، مرة ما توقعته كذا وفيها فعاليات كثييير ممكن (رحلة ساعة بالمركب، مراكب تجديف، هايكينق، ممكن تستأجروا سيارة رحلات الي تصير زي البيت أو تستأجروا كوخ وتسووا كامپنكق كم يوم أتوقع هذه الفعاليات الي في ما أعرف لو في غيرها ولا لا) 

الهايكينج كان مرررة حلو وممتع وغير عن التراب والحجر الي نسويه بالرياض

صورة من رحلة المركب

وفي بوسط الهايكنج مكان نعدي من فوق النهر بزي جسر ندفه بنفسنا بالحبل كانت من أحلى الفقرات في الهايكنج. 

• Map of Africa :

هي عبارة عن منطقة مرتفعة تشوفوا فيها كيف شكل الأنهار مع الطبيعة صايرة كأنها خريطة أفريقيا، ما حياخذ منكم الموضوع إلا ١٠ دقايق بالكثير وممكن تتمشوا في نفس المنطقة إما برجولكم أو بالسيارة.

تقريبًا هذا كل الموجود فيها لأنها أقرب لإنها تكون قرية أكثر من مدينة؛ بس الناشونال بارك ممكن تكون وجهة لأكثر من يوم وكل مرة تسووا نشاط مختلف فيها خصوصًا التخييم أقدر أتخيل إنه حيكون تجربة مرة حلوة.

• The Garden Route - Knysna : 

الأوتيل : Pezula hotel & resort 

الأوتيل مرة حلو ! ريزورت من جد 

كبير والتمشاية فيه مررة حلوة لأنه كله زرع والغرف منفصلين عن بعض صاير كأنه فلل صغيرة وعشان تطلعوا للريسبشن تمشوا بالهواء، وتقدروا تمشوا برجولكم أو تطلبوا سيارة القولف توصلكم. السپا حقهم حلو مرة جربت عندهم المساج العادي وكان من جد يفك العضلات تفكيك !

هذا شكل المبنى لكل ٤ غرف منفصلة عن بعض

بالنسبة للأكل فطور الأوتيل عادي جدًا، غداهم وعشاهم مو حلو أبدًا وما ننصح فيهم إطلاقًا.

عندهم مطعم إيطالي في الووترفرونت لذيييذ جدًا اسمه Cafe Mario جربنا من عنده :
- بيني أرابياتا (ممتاازة)
- مارقريتا بيتزا (عادية، ووصلتنا باردة)
- فيتوتشيني ألفريدو وأضفنا معها بروكلي واستبدلنا الهام بالدجاج (لذيذة)
- Polo al limone (لذيذة جدًا جدًا) 

جلسة المطعم حميمية, بس الطاولات بزيادة ملصقة ببعض فصاير ترتيب المطعم حوسة شوية بس خدمتهم ممتازة والويترز ومدير المطعم حبوبين مرة.

•  Elephants Park :

 مرة تجربة تستاهل الزيارة الصراحة ! 

في البداية ورونا فيلم وثائقي من صنعهم عن الفيلة 

بعدين نروح نأكّلهم ونتصور معهم ونجلس شوية معهم بعدين نرجع، الزيارة هذه تقريبًا أخذت مننا ٣٠-٤٥ دقيقة، ننصح بإنه يكون معكم قارورة موية لأن المنطقة الموجود فيها الفيلة مافيها مغاسل فحتضطروا تنتظروا إلين ما تنزلوا تحت وتغسلوا بالمغاسل لو ما كان معاكم موية، والفيلة شوية توصخ اليد الصراحة.

• Monkey Land :

عن مكان كبييير كللله قرود كأنكم تتمشوا بالغابة فيه تقريبًا ٧ أنواع وكل نوع في منه عدد كبير بس مهم تنتبهوا على أغراضكم وما تخلوا معكم أشياء ملفتة أو أكل لأنه في قرد كان حيسرقنا من جد،  أخذت مننا الجولة تقريبًا ١٥-٢٥ دقيقة 

تصميم المنطقة بنفس هالشكل، الشجر فوقكم وجمبكم والقرود مفلوتة 

• Juckany "Wild Cats" :

 هذا مكان جمب المونكي لاند وتابع لهم، المكان كبير زي حديقة الحيوانات بس مخصص لـ wild cats إلي هم الأسود والنمور والفهود والوشق وهذه الحيوانات 😍 وأحلى شيء إن إلي يسوي التور فاهم مرة بالعلوم فيعطيكم معلومات حلوة عنهم ودقيقة  مرة، أخذت مننا الجولة تقريبًا ١٥-٢٥ دقيقة

* في كمان مكان تابع لهم حق طيور بس ما رحناه 

• Waterfront :

يقولوا إنه مرة كبيير بس هو مو مرة كبير عشان ما تنخدعوا بس 😂 رحناه مرة بالليل ومرة  العصر حلو بالوقتين بس بالشمس أحلى من الليل عشان المنظر أوضح، فيه عدة محلات لوكال وعدة مطاعم وغالبها بحرية بس ما جربناهم، جربنا عندهم المطعم الإيطالي إلي تكلمت عنه فوق Cafe Mario، وجربنا قهوة من كم مكان وكانوا حلوين.

* الصور من google

• السفاري :

بعدها رحنا للسفاري وكانت من جد من أحلى التجارب إلي عشناها لأنكم تقدروا تشوفوا من جد كيف الحيوانات تعيش في الغابة من جد مو زي حدائق الحيوان إلي يصير محبوس بقفص ومو حُر ! 

سكنا في Gondwana السفاري هذا رهيب، أولًا ترحيب الموظفين وتعاملهم رهيب مرة وخدمتهم حلوة، والمكان يعيشك جو السفاري من ناحية الديكور وكيف إن الغرف عبارة عن أكواخ ديكورها حلو مرة وحتى ديكور اللاونج والريسبشن نفس الشيء، بس عيبها الشاور في وسط الغرفة ومافي ستارة ولا باب ولا شيء يغطي .. فالخصوصية بالشاور صفر! فيبغالكم تقريبًا خطة للترويش بالدور واحد يستنى باللوبي عبال ما الثاني يخلص ترويش.

هذا شكل الأكواخ من برى

إيش فكرة السفاري؟ وكيف الوضع هناك؟ 

السفاري عبارة عن مكان تقريبًا يبعد ٤٥ دقيقة إلى ساعة عن المدينة، هو منطقة كبيرة جدًا زي الغابة بس غالب أشجارها قصيرة ومليانة حشائش فتقدروا تشوفوا أغلب المكان، وياخذكم التور قايد في جولة بين أرجاء المنطقة عشان يوريكم الحيوانات .. 

*إنك تروح السفاري لا يعني إنك حتشوف كل الحيوانات*  

لأنه في حيوانات تتخبى وفي حيوانات لها مكان معين بس تحبك سبحان الله إنها ما تكون في مكانها لمن تروحوا فانبسطوا بالموجود؛ بعض الحيوانات إلي شفناها :

الغزلان

الأسد

 الزرافة

وحيد القرن "rhino"

عشان تصير عندكم فكرة أكبر عن السفاري بوصف لكم اليوم من أوله عشان تتخيلوا كيف النظام وتجيبوا معكم إلي تحتاجوه: 

أول شيء تبدؤوا تتجمعوا الساعة ٦:٣٠ الصباح في اللاونج المخصص، حيكونوا مجهزين لكم شاي وقهوة وشابورة لذيذة لا تفوتوها

على الساعة ٧ يبدأ ركوب السيارات والانطلاق في السفاري، السيارة الوحدة تكفي تقريبًا ١٠ أشخاص بدون السواق إلي هو التور قايد حقكم

 

السيارات مكشوفة، والفترة إلي إحنا رحنا فيها كان برد والهواء مرة قوي لمن نمشي بالسيارة فضروري تكونوا متدفيين كويس خلال هالرحلة وفي لبس هم حاطينه بالسيارات إلي تشوفوه بالصورة تحت ننصحكم وبقوة تجربوه لأنه من جد يعزل الهواء

مرة حلو يكون معكم منظار عشان الحيوانات البعيدة تقدروا تشوفوها كويس وفي حال ناويين تاخذوا معكم كاميرا خذوا عدسة للتصوير من بعيد، تقريبًا حتتجولوا في المنطقة إلى ٨:٣٠-٩ صباحًا، تقدروا تتأكدوا من التور قايد احتياط، بعدها توصلوا مرة ثانية للأوتيل وتفطروا،  فطورهم كان حلو جربنا الأومليت كانت حشوته لذيذة، واليوقرت عندهم لذييذ مرة ألذ يوقرت ذقناه خلال الرحلة. بعدها ترتاحوا إلى وقت الغداء -مو متأكدة أي ساعة وما جربنا غداهم- بعدها على الساعة ٣:٣٠ أو ٤ تتحركوا للجولة الثانية نفس فكرة الجولة الأولى وتقريبًا نفس المدة ترجعوا الأوتيل على الساعة ٦ أو ٧ وممكن تطولوا زيادة لو كل إلي بالسيارة موافقين بعدها ترجعوا للأوتيل يكون وقت العشاء كانوا حاطين بالبوفيه شوربة لذيذة بس ما أتذكر إيش مكوناتها لأني كنت وقتها بردانة وأبغا أي شيء يدفي فكان أهم شيء عندي إنه يكون بس حلال، جربنا من عندهم الستارتر "كرات الريزوتو" كانت لذيذة، وبعدها دجاج تندوري كان عبارة عن دجاج متبل لا يمت للتندوري بأي صِلة والرز كان مو مستوي .. ،  بعد العشاء يكون انتهى اليوم وتقدروا ترجعوا كوخكم بسلام، في ميزة حلوة بمرتبة السرير إنها مزودة بتقنية تدفئة وبقول لكم على خدعة حلوة لمن تطلعوا للجولة الأولى لو تبغوا السرير أدفى عشان تناموا لمن ترجعوا شغلوا تدفئة المرتبة وحطوا مخدات مكان نومكم كأنه في أحد بالسرير وغطوها بالبطانية ترجعوا والسرير يشهيكم للنوم من الدفء.

وجهة نظرنا .. يوم واحد يكفي مرة للسفاري ما يحتاج أكثر من يوم، بس أهم شيء تروحوا كل الجولتين ✔️

ولأن الأوتيل بوسط هذه المنطقة فلازم تكونوا حذرين في الدخلة والطلعة لأن ممكن تجي حيوانات عند كوخكم؛ إحنا كمثال زارتنا الحمير الوحشية تقريبًا ٥ منهم 

• Cape Town : 

هنا تشوفوا السياح والمواطنين بجميع أشكالهم، والمسلمين أكثر فيها، معروف عن كيپ تاون إنها مليانة أكتيڤيتيز ومناطق سياحية أكثر من غيرها.

كم أفضل مدة نقعد فيها في كيپ تاون؟ 

أسبوع إلى ١٠ أيام بالكثير، أكثر من كذا نشوف إنه كثير عليها

أنشطة كيب تاون :

إلي ممكن تسووها كثير، بس بكتب لكن عن إلي رحناها : 

• Waterfront :

عبارة عن تجمع محلات ومول ومطاعم ومقاهي وشوية ملاهي، حلو صباحًا ومساءً، وأحلى وقت على العصر مع الغروب ، فيه محلات حلوة أكثر من المول Zara, H&M, Gucci, Louis Vittoun, Ted Baker ... وحلو تروحوه أكثر من مرة ما ينطفش خصوصًا فيه كثير street bands يغنوا ويرقصوا مسويين جو مرة 

• Cannal Walk Mall :

 الصراحة المول مو مرة حلو ما حبيت المحلات كثير بس لازم 

• ركوب الأحصنة على الشاطئ :

كان من أكثر التجارب الممتعة والمختلفة جددًا عن ركوب الحصان على العشب ولا التراب تجربة حلوة مرة

هذا شكل الاسطبل من جوا

في هذه الغرفة لبسنا الخوذة وأعطونا شنطة تتسكر بسحاب للأغراض إلي ممكن تطيح مننا خلال الجولة، لأنها لو طاحت في الموية يمكن يجي موج قوي  وما نقدر نلقاها مرة ثانية

 نهاية الجولة رجعنا على الأحصنة للاسطبل مرة ثانية ونزلنا بنفس المكان إلي ركبنا فيه

• جولة بالهيليكوپتر حول كيپ تاون :

كمان كانت من التجارب الممتعة والمختلفة ممكن تاخذوا جولة نص ساعة أو ساعة 

أخذنا المكتب من الووترفرونت بسيارة القولف لمنطقة الهيليكوبترز وبعد ما خلصنا من الجولة رجعنا لنفس مكاننا بالهيليكوبتر كمان

منطقة الهيليكوبترز 

 أثناء الجولة 

منظر المدينة من الهيلوكوبتر

في منطقة الووترفرونت مليانة بوثات للشركات إلي عندهم هيلكوبتراكت، تقدروا تحجزوا عند إلي تشوفوها مناسبة لكم.

• Cape Town Oistrech Ranch :

 عبارة عن مزرعة للنعام تاخذوا نبذة عن النعام وتكوينهم بعدها تشوفوا جنسيات مختلفة للنعام كل نوع من بلد ويعطوكم أكل تأكلوهم بعدها في فقرة إنكم تركبوا على النعامة ويصوروكم بس الصراحة أحس حرام مسكينة النعامة خصوصًا إنه الطريقة إلي مسكرين عليها فيها عشان يركبها الواحد شوية مافيها رحمة فما أشجع على ركوبها أبدًا 

مدخل المزرعة 

قبل ما نطلع للنعام يعطونا شوية معلومات عن تكوينهم وتغذيتهم

في هذه الصورة يتضح لكم إنه الأكل عبارة عن حبوب ذرة مع حصى لأن النعام مالهم أسنان فهالطريقة تساعدهم في طحن الحبوب

يعطوكم كمان أكل مخصص للنعام عشان تجربوا تأكلوهم

 بيض النعام سبحان الله يقدر يتحمل يشيل وزن إنسان

• Boulders Beach penguins colony :

شاطئ كله بطاريق بانيين جسر فوق رمل الشاطئ بحيث تمشي وتشوف البطاريق على اليمين وعلى اليسار ما تصير قريب منهم مرة ولا تلمسهم ولا تأكلهم 

 بداية الجسر إلي يوصلنا للبطاريق

• Table mountain :

 هذا الجبل تطلعوا لقمته بالتلفريك وتلقوا مقهى ومطعم فوق ممكن تجلسوا فيهم

 في القمة ممكن تحجزوا تذاكر وتنزلوا ١١٢ متر بالحبل من الجبل وبعدها تكملوا هايكنج إلى القمة مرة ثانية هذه كانت من أعظم التجارب إلي جربناها مو طبيعي كيف كانت حلوة

 اسم الجهة المسؤولة عن النزول بالحبل Absil Africa 

 بعد ما ننزل بالحبل نطلع مرة ثانية للقمة بس هالمرة برجولنا، فهنا تصير تجربتين في واحدة نزل من الجبل بالحبل بالإضافة إلى هايكنج، إذا كنتوا تفكروا تنزلوا من الجبل ننصحكم بلبس جزمة كبيرة مناسبة للهايكنج لأن المسافة كبيرة مو بسيطة، وصادف اليوم إلي رحنا فيه إنه الجبل كان مليان بقايا مطر من اليوم إلي قبله فشوية تبهذلنا لأننا ما كنا مستعدين ولا نعرف عن هالفعالية.

ختمنا الجولة بهوت تشوكلت لذيذ جدًا من نفس المقهى الموجود في قمة الجبل

• Cape Town Diamond Museum 

متحف للألماس ياخذوكم في جولة في بدايته عن الألماس وتاريخه وتصنيعه 

وبعدها تمروا على الموظفين وهم يشتغلوا على الألماس 

 وبالأخير يشرحلكم التور قايد عن أنواع الألماس من حيث (اللون، النقاوة، الحجم، القصة) وممكن بعدها تشتروا من عندهم

• Bo-Kaap

المباني الملونة تعبر عن تقبل اختلاف الأعراق والألوان والحرية، وأغلب السكان في هالمنطقة من المسلمين

*الصورة من google

• Cape Point :

 هي نقطة التقاء المحيط الهادي مع الأطلسي وقريبة جدًا من  "رأس الرجاء الصالح" ومليان قرود هناك"بابونز" فانتبهوا على أغراضكم عشانهم ما يسرقوها القرود خصوصًا الأكل، وإحنا طالعين للتلفريك وقفتنا وحدة عربية وقالت لنا انتبهوا على أغراضكم ولا تاخذوا معاكم أكل فوق لأن في بنت كان معها كيسة ساندوتش وجاء البابون وأخذ منها الكيسة ولمن لقاها مافيها أكل رجع وضربها .. فخذوا الحيطة لأنه من جد لمن طلعنا فوق لقيناهم ياكلوا من أكل الناس وواحد يشرب عصير من قارورة.

مطاعم كيب تاون :

• Mantra café 

جربنا الSpicy Lamb Curry وكان لذيذ 

• The red Herring :

جربنا منهم ٣ أنواع بيتزا :

- Margarita Pizza
- Mexican Pizzza

- Red herring Pizza

كانوا حلوين، وأحلاهم المارقريتا

• Belthazar :

(chicago, rib eye) جربنا هالنوعين وكلهم لذيذين مررة من أحلى الستيكس إلي ذقناهم

• Cinnabon :

لاازم تحلوا عليه مو طبيعي كيف طااازج

• San marco :

 ما ننصح فيه ، أقل من عادي (مطعم إيطالي) 

• Natasha :

 لذيذ وجلساته زي مطاعم الرياض المرتبة (جلسات الووتر فرونت هي الي حلوة أما جلسات كانال ووك أقل من عادية) 

lengini alfredo

san paulo 

* نصيحة  لا تطلبوا كوكتيلات من عندهم ڤيرجن لأنها مو حلوة بس باقي الطلبات كانت ممتازة

• Primi :

أكلهم كان لذيذ، بس صوص السلطة ما كان حلو، فسوينا صوصنا بالليمون والملح والفلفل وزيت الزيتون

chicken kebab

chicken and pesto pasta

green salad

• Mugg & Bread :

للأسف ما كتبت اسم الطلب، بس كان عبارة عن سلطة فيها أفوكادو، ذرة، طماطم، خيار، دجاج متبل ... 

بس كانت لذيذة السلطة

• Life Grand Cafe :  

زرناه مرتين بنفس اليوم، مرة جربنا وافل بالنوتيلا، ومرة جربنا هالحلى إلي بالصورة 

Nutella brioche 

انتبهوا من النورس .. لأنه فجأة نط على طاولتنا وأخذ حبة وافل وطار 

• Magica rome :

  ديكور المطعم قديم بس حميمي مليون، الخدمة عندهم خرااافية مو طبيعي كيف الوييترز رهيبين وكل شوية يجي الشيف ويتطمن لو عجبنا الأكل أو لا، واحتفلوا فينا من نفسهم لمن عرفوا إننا بشهر العسل، طلبنا سلطة وريزوتو بالزعفران واللحم ، صوص الريزوتو الصراحة كان لذيذ جدًا بس للأسف الرز كان مو مستوي زي ما إحنا متعودين ولمن سألنا الشيف عن السبب قال هذه هي طريقة الريزوتو الصحيحة في ايطاليا، أعتقد الباستا والمكرونة عندهم لذيذة كمان،

*  نقطة مهمة عندهم ساعات معينة للعمل فأحسن تتأكدوا من مواعيد العمل + تكلموهم تحجزوا لأن المطعم لمن رحناه كان زحمة مرة

وأخيرًا وليس آخرًا؛ التقييمات هي تقييماتي أنا وسلمان الشخصية، وكتبت عن الأشياء إلي جربناها بس.

هل أشوف الدولة مناسبة لشهر عسل؟
جدًا! البلد مرة حلوة ومختلفة عن أوروبا ولها جوها الخاص في حال كنتوا تحبوا الحيوانات لأن أغلب الفعاليات كانت روحات للحيوانات فحتكون وجهة مرة مناسبة بإذن الله