وحدة لتنظيم الفواتير والضمانات

 بسم الله الرحمن الرحيم

السلام عليكم ورحمة الله وبركاته

الفواتير والضمانات أقدر أصنفها من أكثر الأشياء إلي لو ما عرفنا نسوي لها نظام كويس في البيت حتضيع مننا وحيصعب علينا مرة إننا نوصل لها لمن نحتاجها.

  

جلست فترة أبحث عن طرق لتنظيمها بشكل مرتب في دولاب المكتبة ولقيت أفكار مرة كثيرة، بعضها جاهزة وبعضها نقدر نسويها في البيت، وبعد البحث المطول الطريقة إلي عجبتني إنها تكون وِحدة تجمع عدد من الملفات وفي طرف كل ملف مكتوب عنوان لمحتواه، لقيت أشكال جاهزة أونلاين وفي بعض المكتبات بس إما إن مقاسها مو مناسب للدولاب، أو شكلها مو مرة حلو، أو تحدني بعدد الملفات أو حجمها أو حتى مقاسها؛ من هنا جت فكرة إني أسوي شيء يناسبني. 

الأدوات إلي استخدمتها:

- سلة بحجم وتصميم مناسب للدولاب وأهم شيء تكفي الملفات.

- ملفات (بحثت كثير إلين ما لقيت هذا المقاس إلي تكون قاعدته عريضة فيكون مناسب حجمه لمن تكون محتوياته كثيرة ما يصير منفوخ بشكل مو مرتب بحيث يعيش معاي مو أول ما أحط كم ورقة يصير ما يكفي زيادة) هذا رابط للملفات إلي اشتريتها بس مقاسها أكبر من إلي عندي، المقاس إلي عندي مخلص. : 

https://www.amazon.com/dp/B082CQ3JSD/ref=cm_sw_r_oth_api_glt_fabc_E1KETJ37P9MZ2Z78W0FD

- أعواد شيش طاووق خشبية (استخدمتها لأني شفت إنها مناسبة جدًا مع نوع خشب السلة ولونه).

- صمغ مسدس.

- زرادية.

- حديد ملف علاقي (من جرير، وأتوقع تلقوه بأغلب المكتبات) .

المشروع جدًا بسيط ومرة ما ياخذ وقت .

أول شيء أخذت قياسات الملفات بالنسبة للسلة وعلى أساسها ثبتت أعواد الشيش طاووق في السلة بحيث تكون الملفات متكية على الأعواد، وعشان يكون شكل الأعواد مرتب استخدمت الزرادية بحيث أقصها بالضبط على مقاس السلة.

بعدها ركبت الملفات، ولصقت الحدايد في الملفات  (أهم شيء تركيب الحدايد يكون بعد ما ناخد مقاسات الملفات الشفافة عشان تكون مرتبة ما يكون شيء طالع وشيء داخل).

عشان أثبّت الحدايد استخدمت صمغ مسدس، وتأكدت إنهم ثِبتوا كويس قبل ما أدخِّل الملفات البلاستيك.

كذا صار كل شيء جاهز، إلي باقي إننا نصنف الفواتير والضمانات بحسب المواضيع ونبدأ نرتبها على هالأساس، أنا سويت وِحدتين؛ الأولى للفواتير والضمانات، والثانية للكاتلوجات المهمة، بعد كذا فرزت إلي موجود عندي وصنفتها لمواضيع (أثاث، سيارات، شخصي، أجهزة) وكل موضوع مقسم جوا لتقسيم فرعي إضافي مثلًا الأجهزة (إلكترونيات زي الجوالات والكمبيوتر ..، أجهزة كبيرة زي الغسالة الثلاجة ...، أجهزة مطبخ زي العجانة ومحضرة الطعام ...) وهكذا.

أفكر أضيف تقسيم للتصنيف الفرعي جوا كمان بفواصل بحيث يصير أوضح وأرتب، إذا أضفتها إن شاءالله حأشارككم الشكل النهائي هنا بعد ما أحدث التدوينة.

فكرة المشروع بسيطة وسهلة وأبدًا ما أخذت مني وقت!

إن شاءالله تكونوا استمتعوا بهالتدوينة، وإذا سويتوا زيها شاركوني 

مراجعة مكينة القهوة أوسكار ٢ | Nuova Simonelli Oscar II

بسم الله الرحمن الرحيم

السلام عليكم ورحمة الله وبركاته

قبل ما أتكلم عن مكينتي .. بقول لكم معادلة بسيطة، لأني متأكدة إنه إلي زيي حيفكر بعد هالكلام إنه يشتري مكينة بغض النظر كانت أوسكار ٢ أو غيرها من الأنواع.

القصة وما فيها إني أشرب قهوة يوميًا، وأحب اللاتيه اللذيذ، ما أحب القهوة الفورية، ولا الأظرف ولا نيسبريسو، وكنت يوميًا أشتري قهوة إلي قهوتين من بدرى يعني تقريبًا باليوم الواحد أدفع أدفع على كوبين القهوة ٤٠ ريال -كحد أدنى لو افترضنا إنه كل كوب بس ب٢٠ ريال- (حسبة شيَّاب) لقيت إني أدفع سنويًا ما يُقارب ال١٤ ألف ريال .. بالغت؟ احسبوها بنفسكم ٤٠*٣٦٥ يوم. خلونا ننزل السعر شوية ونقول في أيام أشرب كوب واحد؛ حيطلع تقريبًا ١٠ آلاف ريال .. يظل مبلغ خيالي جدًا على مجرد أكواب قهوة في سنة واحدة!

السبب الثاني إنه ودي أسوي قهوة لذيذة في بيتي، ما أضطر إني أطلع من البيت ولا أرسل أحد يجيب لي قهوة لذيذة، إذا قمت إن شاءالله الفجر أقدر أشرب، ووقت الصلاة، وصباح الجمعة وأي وقت أشتهي أسوي فيه قهوة يكون عندي خيار لذيذ وسريع. 

وقتها جزمت أجيب مكينة وبدأت رحلة البحث عن مكينة القهوة المنشودة ..  

بحثت وبحثت وبحثت وسألت أشخاص خبراء في مجال القهوة واستشرت واستقريت على هذه المكينة لأني شفتها الأنسب لي، خاصةً إني ما أبغا أشتري مكينة وبعد فترة أصير أبغا أغيرها، فبحثت كويس عشان أتفادى هذه النقطة، وبنفس الوقت ما أبغا أدفع مبلغ جدًا عالي على مكينة أنا مو متأكدة إذا من جد كنت حألتزم فيها وأستخدمها للغرض إلي اشتريتها عشانه وأنقطع عن الشراء من المقاهي بنسبة ٩٠٪ خلونا نقول.

في هذه التدوينة حأشارككم فقط خواص أوسكار٢ وتقييمي لها، ما حأقارنها مع بقية مكاين القهوة. 

يييييي

سعرها وقت ما اقتنيناها كان ب3999 ريال من موقع كاڤا شوب تقدروا تتأكدوا من سعرها لو تغير بالموقع هذا رابط المكينة من المتجر

https://qavashop.com/en/nuova-simonelli-oscar-ii.html

*ما أتذكر أي تفاصيل عن تجربة الشراء من الموقع، وهل هو أفضل موقع أو لا ..*

المكينة حجمها كبير، ومقاساتها الدقيقة ٤٠*٣٠*٤٠ سم  ووزنها ١٤ كجم

ومتوفر منها ٣ ألوان فقط، الأسود -زي مكينتي-، الأحمر والأزرق.

"ولمن يهمه الأمر: ١١٠ فولت، و ١٢٠٠ واط"

الارتفاع من الكوب الى البورتافلتر ١٠ سم، يعني تقريبًا تكفي غالبية الأكواب المتعارف عليها وحتى إلي يعتبر  حجمها كبير إلى حدٍ ما، ليش هالنقطة مهمة معرفتها؟ كانت عند أهلي مكينة قهوة ارتفاع مساحة الكوب صغيرة وما تكفي أي كوب فإذا كوبي كان شوية تصميمه مختلف أو ارتفاعه يختلف عن الارتفاع المتعارف عليه فللأسف ما يدخل فيها الكوب وكنت أضطر أنقل القهوة من كوب للثاني إذا اشتهيت أشربها في كوب مقاسه مو مناسب فهالموضوع كان بالنسبة لي مهم أثناء البحث.

صينية التقطير إلي تحت الكوب أشوف عمقها ممتاز، مساحتها كافية بحيث إني ما أحتاج كل ماتنزل فيه موية مباشرة لازم أكبها.

إذا لاحظتوا الجزء الأمامي للمكينة مصنوع من الستاينلس ستيل، والهدف منه هو إنه يعكس صورة الاستخلاص عشان تصير مستوى جودة الاستخلاص واضحة للباريستا/المستخدم ويعرف إيش جالس يصير من كل الجهات، مو بس من الأمام والجمبين.

الشيء إلي خلاني أجيب هذه المكينة تحديدًا وأجزم عليها عدة أمور، أهمها هو إنها تصنع قهوة باحترافية عالية بنفس جودة قهوة المقاهي، بس هالطراز مصمم خصيصًا للاستخدام المنزلي، وبإمكانها إنها تسوي قرابة ١٥ كوب قهوة باليوم. 

التبخير فيها خرافي، مو بس من تجربتي، بشهادة مسابقات اللاتيه آرت العالمية الي كانوا يستخدموا فيها عصاة التبخير نفسها. 

من ميزاتها إنها تحتوي على مبادل حراري، 

فكرته ببساطة إنك تقدر تستخدم عصا التبخير وتستخلص قهوة في نفس الوقت ! 

يعني ما يحتاج تخلص من الاستخلاص وتنتظر عصا التبخير تسخن بعدين تبخر الحليب، ايش الفايدة من إني أسوي الاثنين سوا، اختصارًا للوقت خاصةً لو حتسوي مجموعة أكواب مع بعض. 

سخان الموية لو فتحنا المكينة، حنلقاه معزول، يعني إنه يخفف من استهلاك الطاقة بهالشكل، ما يقعد طول الوقت يستهلك طاقة. 

سهلة أو صعبة الاستخدام؟ 

أي شيء في البداية يكون صعب، إلين ما نفهمه ونتعلمه ونمارسه بشكل مستمر.

بإذن الله في تدوينة ثانية بشارككم بعض النصائح والمصادر والتدريبات إلي فادتني في تعلم القهوة، وأفضل الأدوات إلي جربتها وعجبتني وأنصح فيها. 

المكينة ما فيها فلسفة كثير فيها ٤ أزرار فقط (زر التشغيل والإغلاق، زر للسنقل شوت، زر للدبل شوت، مقبض لتبخير الحليب) وفيها علامتين (حرارة الماء، وخزان الماء)، العلامة إلي أعلى اليمين تدل على حرارة الماء، أول ما نشغل المكينة تنور بالأحمر لأن الموية لسا مو جاهزة، لمن تسخن وتجهز حيطفي النور، ممكن بعد ما نشغلها بفترة يطفي النور وبعدين ترجع تنور مرة ثانية وفي هذه الحالة لازم ما نستخلص قهوة إلين ما يطفي النور لأن الموية وقتها ما تكون حرارتها مناسبة. العلامة إلي أعلى اليسار تدل على مستوى الموية، إذا نوَّر يعني الموية قليلة ونحتاج نعبي خزان الموية وما حتشتغل طالما الموية ما تكفي.

بالنسبة لمقبض تبخير الحليب إلي على الجزء العلوي للمكينة أشوفه جدًا ممتاز! وقت ما كنت أبحث عن المكينة لقيت إن الشركة خلته مقبض دفع وسحب بدل ما يكون عجلة تنفتح وتتسكر بالدوران عشان يكون التبخير أسهل وأسرع وأحييهم على هذه الميزة صراحة خاصةً إنه بهالطريقة يصير مستوى التبخير واحد وما يعتمد على حسب قد ايش لفيت العجلة يزيد أو يقل التبخير.  

الجهة العلوية من المكينة تتميز بإنها تسخن إلى حد معين فبالتالي تسهل عليك تجهيز الأكواب بإنها تسخنها لمن نحط الأكواب عليها مقلوبة زي كذ، حركة تجهيز الأكواب بإنها تكون ساخنة قبل ما نستخلص القهوة تساعد على إن قوام القهوة يكون أفضل. 

خزان الموية يكفي تقريبًا ٣ لتر موية، وميزته كمان نقدر نشيله من المكينة وننظفه -إذا استدعى الأمر- ونرجعه بكل سهولة.  

برمجة الشتوس :

حبيت فيها جدًا فكرة إنه عندك خيار إنك برمجة مقدار الشوت عشان تكون عملية أكثر ،نقدر نتركها بدون برمجة ونصير نقيس بالنظر في كل مرة ونوقفها متى ما نبغا. وزي ما هو موضح في الصورة عندنا زر للشوت الواحد، وزر لل٢ شوتس وكل وحدة برمجتها منفصلة عن الثانية. 

أوسكار ٢ يجي معاها ٣ قطع خارجية:

البورتافلتر إلي على اليسار فقط هو إلي يجي مع المكينة، إلي على اليمين ينشرى كقطعة منفصلة (مو ضروري، وما يختلف الاستخلاص فيه اللهم شكله أحلى ويوضح لك شكل الاستخلاص أكثر) 

ويجي معاها كمان هذه القطعتين، إلي على اليمين ملعقة معيارية (أشوفها كويسة لأنه في كل الأحوال لازم تنقاس القهوة بميزان فمو مرة مهم يكون فيها خصائص معينة -على الأقل بالنسبة لي-)

القطعة إلي على اليسار هي التامبر .. هذا الصراحة سيء مرة لازم تجيبوا تامبر بداله، والسوق مليان أنواع ممتازة.

نقطة مهمة جدًا .. 

هذه المكينة تحتاج تعديل قطعتين أساسيات وبعض المكاين تحتاج تعديل ٤ قطع، أنا عدلت ٣ قطع وهي:

١. حلقة مطاطية (ربر) للقروب هيد (السوداء كانت في المكينة واستبدلتها بالربرة الحمراء).

٢. قطعة تعديل الضغط opv، السبب إنه هذه المكينة ضغط البار فيها يوصل ١٢-١٦ وعشان يكون مناسب لازم توصل لقرابة ال٩، فهذه القطعة تعدل لنا الضغط

 بعد ما نعدل الضغط لازم نتأكد من إنه وصل لل٩ بتيرمومتر القياس.

٣. شاور سكرين جديد للقروب هيد (في الصورة الشاور سكرين إلي جا مع المكينة، ما صورت الجديد ...).

كل هالقطع وغيرها مثل المسمار المسطح تلقوها في غالبية مواقع ومحلات أدوات القهوة  والباريستاز.

ممكن تحصلوها في: 

https://qavashop.com/en/

https://iambarista.net/

https://sa-variety.com/

https://mothhelah-store.com/

https://bt-sa.co/

هذه بعض المواقع إلي ممكن تحصلوا فيها أدوات القهوة.

بعد ما شاركتكم تقييمي الشخصي ورأيي "الإيجابي" عن المكينة، بشارركم بعض الأشياء إلي مو مرة حبيتها أو تمنيتها بالمكينة -من وجهة نظري-:

١. ما حبيت إنه لازم أشتري كم قطعة منفصلة وبعدين أركبها بنفسي بالمكينة، كنت أفضِّل لو أدفع زيادة على قيمة المكينة بس تصير القطع المركبة جاهزة (مو شرط انتِ تركبيها بنفسك، في أشخاص فاهمين في المكينة ممكن ترسلي لهم مكينتك ويعدلوا لك كل هالتفاصيل بمبلغ معين).

٢. شكلها حلو، بس تمنيت شكلها أحلى زي بعض مكاين القهوة من شركات ثانية  (كتصميم خارجي)

٣. تمنيت إنه فيها خاصية طحن قهوة، (لقيت كم مكينة مختلفة فيها مطحنه بس حبيت خواص هذه أكثر وشفتها أفضل من رأيي).

بعد ما جبت المكينة وتعلمت عليها وصرت أضبط القهوة، صرنا نقدر نستمتع بقهوة لذيذة وسريعة وفي أكواب حلوة مو ورق وإحنا جالسين في بيتنا بدون ما نطلع أو ننتظر أحد يوصل لنا قهوة! وصارت فقرة حلوة حتى لضيوفنا إننا نسوي قهوة مع بعض.

طريقة صنع شنطة تسوق مكرمية

بسم الله الرحمن الرحيم

السلام عليكم ورحمة الله وبركاته 

موضوع التدوينة اليوم خفيف ولطيف وسهل جدًا! 

بما إن عندي خيوط للمكرمية باقية من الجدارية إلي سويتها قررت إني أدور لي أعمال يدوية منها ومفيدة لي شخصيًا عشان أستخدمها، ووقع القرار على إني أسوي شنطة تسوُّق "Shopping Bag" باستخدام خيوط وعقد المكرمية. 

وقلت عشان يكون تطبيقها أسهل عليكم بسويها باستخدام غرزة واحدة فقط اسمها العقدة المربعة "Square Knot" هذه تقريبًا من أهم العقد في عالم المكرميات والعقد.

الأدوات :
- خيوط مكرمية ( ٣٢ خيط بطول ١٨٥سم وخيطين يمثلوا القاعدة  تقريبًا ٥٠ سم)
- مقص
- ستاند زي حق الملابس (مو ضروري مرة، بس مرة بيسهل عليك الشغل)
- سنارة كروشيه (مو ضرورية بس ممكن تحتاجيها لتنظيف الشغل)

أول خطوة:

نقسم الخيوط ١٦ للجهة الأمامية و١٦ خيط للجهة الخلفية من الشنطة،

نبدأ الآن بعقد الخيوط ال١٦ على الخيط الأساسي "القاعدة" بهذه الطريقة

نلف الطرف إلى فوق على تحت

وبعدها ندخل الخيط في اللفة من فوق

ونسحبها

وبنفس الطريقة نكمل بقية الخيوط ال١٦، بعد ما نخلص ننتقل لأول صف من العُقَد في شنطتنا

في هذه الشنطة كاملة حنعتمد  [ العقدة المربعة | Square Knot ]

هذه العقدة تحتاج ٤ خيوط جمب بعض الخيطين إلي حنعقدهم في بعض هم أول وآخر خيط فقط، الخيطين إلي في النص حيظلوا ثابتين زي ما هم في العقدة الواحدة. العقد المربعة عبارة عن عقدتين تُعقد بنفس الطريقة ورى بعض وتُسمى عقدة مربعة واحدة لأن شكلها يشبه المربع، ممكن نسويها عقدة واحدة بس، بس وقتها حتكون نصف عقدة مربعة "Half Square Knot" 

إلي حنسويها عقدة مربعة كاملة. 

الصف الأول : 

ناخذ أول خيط من اليمين ونحطه تحت الخيط الرابع

وبعدها ناخذ الخيط الرابع وندخله في لفة الخيط الأول من تحت على فوق

نسحب الخيط الأول والخيط الرابع  على برى، وبكذا يتكون عندنا شكل نصف العقدة المربعة

بعدها نسوي عقدة مثلها بالضبط، وتصير تكونت عندنا العقدة المربعة.

أول تجربة لها يمكن ما تكون مرة سهلة، بس مرة على مرة بتسهل عليكم لدرجة حتقدروا تسووها بدون ما تفكروا بالطريقة.
بعدها نكمل باقي الصف الأول بنفس الطريقة، ولأن عندنا ١٦ خيط فحتتكون عندنا ٨ عقد مربعة.
بنفس هالشكل

الآن نترك خيطين من اليمين ونبدأ الصف الثاني ونترك خيطين من اليسار، حتتكون عندنا ٧ عقد في الصف الثاني.

يجي دور الصف الثالث بنفس طريقة الصف الأول، وحتتكون معانا ٨ عقد مربعة.
بهالشكل

الآن نسوي الجهة الثانية من الشنطة بنفس الطريقة، بكذا صار عندنا الجهة الأمامية والخلفية من الشنطة

جاء وقت نجمع الجهتين مع بعض عشان يتكون معانا شكل الشنطة
نجمع الخيطين إلي على اليمين مع الخيطين إلي على اليسار بنفس هذه الطريقة

نترك مسافة ٤سم تقريبًا ونسوي عقدة مربعة

مبروك! كذا سوينا أول خطوة بربط الجهتين مع بعض

 نترك خيطين من اليمين ونكمل كل الجهتين الآمامية والخلفية بنفس الطريقة، قرابة ٤سم وبعها عُقدة مربعة ونترك خيطين من الجهة اليسار، بهالطريقة حيتكون عندنا ٧ عُقد في كل جهة وعقدة تربط الجهتين الأمامية والخلفية مع بعض

الخيطين إلي تركناهم هم إلي حيربطوا لنا الجهة الأمامية والخلفية مع بعض زي ما ربطناهم مع بعض من الجمب الأول، وحنسوي فيه نفس الشيء عقدة مربعة.

مبروك مرة ثانية! الحين صارت شنطتنا مسكرة من الجوانب الأربعة الأمامية والخلفية واليمين واليسار

الآن عندنا خيارين، الأول تعليق المكرمية على الستناد أو نسويها بدون ما نعلقها (التعليق بيسهل علينا الشغل إنه يكون نظيف)

الحين نكمل بنفس الطريقة بس على كامل الشنطة، ناخذ خيطين من العقدة المربعة من اليمين وخيطين من العقد المربعة المجاورة من اليسار ونترك مسافة تقريبًا ٤ سم ونعقدهم سوا فيتشكل عندنا شكل "معين" مثل إلي بالصورة إلى نهاية الخيوط، أو إلى ما نوصل للطول المطلوب من الشنطة

الحين أنا أبغا أوقف طول شنطتي إلى هنا، فإلي أسويه إني أسوي نفس ما سوينا في أول ٣ صفوف من الشنطة، ٣ صفوف عقد مربعة مافي بينهم مسافات عشان نكوِّن قاعدة الشنطة وتكون مسكرة إلى حدً ما بحيث ما تطيح منها الأغراض

كذا حيكون شكلها من تحت بعد ما خلصنا الثلاثة صفوف (داير ما يدور)

نربط كل خيطين من الجهة الأمامية بالخيطين إلي يقابلوهم بالجهة الخلفية، ضروري نصير دقيقين عشان ما يصير شكل الشنطة من تحت مو نظيف أو حوسة، نربط كل وحدة مرتين عشان نتأكد إن الربط محكم ومافي شيء حيطيح منها.

انتهينا من رابط كامل الشنطة، الآن نقص الأطراف الزائدة ونقلب الشنطة (الجزء الخارجي حيصير الجزء الداخلي)

جاء دور أيادي الشنطة، سويت ظفيرتين ثلاثية، كل قسم عبارة عن خيطين عشان تصير أعرض وربطتها من الطرفين بنفس الشكل إلي تشوفوه بالصورة. بعدها حطيت طرف الظفيرة مع طرف الخيط الأساسي بشكل معاكس

استخدمت شطرطون ولفيتهم مع بعضهم عشان يسهل علي إنجاز باقي الخطوة، مع العلم إني جربت أكمل الخطوات بدون الشطرطون والصدق إنها تعبتني شوية وكل شوية كانت تنحاس معاي

الآن يدخل للساحة خيط منفصل، ونلفه بنفس هالطريقة (اللفة تكون متعدية طول الشطرطون)، واحد من أطراف الخيط يكون طويل والطرف الثاني يكون طوله  تقريبًا ٤ سم تحت اللصقة

بعدها نبدأ بلف الخيط الطويل حول الصقة والخيط نفسه إلين ما نوصل لطرف اللصقة إلي فوق، أنا بدأت اللف من تحت ودخلت واحدة من العقد في اللفه عشان أتأكد إنها حتصير محكمة أكثر

 ندخل طرف الخيط في اللفة إلي سويناها بالبداية

بعدين نمسك الجزء إلي لفيناه كويس ونسحب الخيط إلي تركناه في الخطوة إلي قبل ونسحبها بهدوء عشان ما نخرب اللفة

بعد ما سحبنا ودخلت اللفة والخيط من تحت اللفات وتأكدنا إنها مشدودة كفاية نقص الخيط ونضبط اللفة لو كانت تحتاج تعديل. وبعدها نمشي على كامل الأطراف الأربعة لأيادي الشنطة.

وبكذا نصير خلصنا من الشنطة !

في حال لقينا خيوط طالعة زي كذا وما قدرنا ننظفها بالقص، فنلجأ للطريقة الأخرى

نستخدم سنارة كروشيه أو أي أداة تأدي نفس الغرض ونبدأ نسخب الخيوط هذه لجوا الشنطة عشان ما تبان.

الشنطة خفيفة ولطيفة وجميلة جدًا باللبس، ممكن تكون شنطة تسوق، بحر، أو لنزهة!

إن شاءالله تكونوا استمتعوا بهالتدوينة، وإذا سويتوا زيها شاركوني